Тошкент шаҳрида ёлғон эълонлар орқали фуқароларни чув тушириш билан шуғулланиб келган шахс қўлга олинди, деб хабар беради ИИВ ЖҚД Киберхавфсизлик маркази.
Қайд этилишича, Учтепа туманида яшовчи 33 ёшли Б.Н. ариза билан мурожаат қилиб, “Олх” платформасида хонадон ижараси тўғрисидаги эълон бўйича номаълум шахсга 950 минг сўм пул маблағларини ўтказиб берганидан сўнг алданиб қолганини маълум қилган.
Олиб борилган тезкор-суриштирув ишлари натижасида, пулларни ўзлаштирган шахс муқаддам жавобгарликка тортилган, Тошкент шаҳар Яшнобод туманида яшовчи, 31 ёшли Ш.Н. экани аниқланган.
Унга кўра, Ш.Н., Б.Н.дан ташқари, “Олх” платформасида хонадон ижараси тўғрисидаги ёлғон эълон бўйича уй қидирган ўндан ортиқ фуқароларни алдаб, пул маблағларини шахсий эҳтиёжлари учун ишлатиб юборгани маълум бўлди.
Ҳолат бўйича Жиноят кодексининг 168-модда (фирибгарлик) 3-қисми билан жиноят иши қўзғатилиб, тергов ҳаракатлари олиб борилмоқда. Қонунга мувофиқ, Ш.Н. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
Март бошларида Тошкент шаҳрида квартира ижарага берилиши тўғрисида ёлғон маълумотларни жойлаштириб, фуқароларни чув тушириб юрган шахсга нисбатан жиноят иши қўзғатилганди.
Изоҳ (0)