Тожикистон пойтахти Душанбе шаҳрида 8 июнь куни Марказий Осиёдаги энг йирик масжидлардан бирининг тантанали очилиш маросими бўлиб ўтди. Бу ҳақда “Ховар” хабар берди.
Расмий очилиш маросимидан сўнг масжидга Имоми Аъзам – Абу Ҳанифа Нўмон ибн Собит номини бериш таклиф қилинган. Очилиш маросимида Тожикистон президенти Имомали Раҳмон ва давлат ташрифи билан республикада бўлиб турган Қатар амири шайх Тамим ибн Ҳамад ал-Соний иштирок этган.
Янги масжид ҳовлиси 12 гектар майдонни эгаллайди, асосий бино уч гектар ва унга учта дарвозадан кирилади. Масжид бир вақтнинг ўзида 133 минг кишини сиғдира олади, шундан 43 минг киши бино ичида, қолгани унинг атрофида жойлашиши мумкин.
“Бу нафақат масжид, балки ислом маданияти ва тарихининг замонавий пойдеворидир, масжид заллари шундай қурилганки, уларда турли даражадаги илмий-маданий тадбирлар, турли даражадаги анжуманлар ўтказилади”, — дея таъкидлайди “Ховар”.
Бўлажак масжид пойдеворига биринчи тамал тоши 2009 йил 5-октябрда ҳанафий таълимотининг асосчиси ва етакчиси Абу Ҳанифа Нўмон ибн Собит таваллудининг 1310 йиллигини нишонлаш чоғида қўйилган эди.
Қурилиш 2011 йил 5-октябрда бошланган ва 2019 йил кузида якунланган. Очилиш маросими 2020 йилнинг март ойида бўлиб ўтиши керак эди, бироқ коронавирус пандемияси туфайли у қолдирилди. Февраль ойида Тожикистон Дин ишлари, миллий анъаналар, байрам ва маросимларни тартибга солиш қўмитаси маросим Қатар амирининг ташрифи чоғида бўлиб ўтишини маълум қилди.
Масжид лойиҳаси деярли 100 миллион долларга тушган, шундан 30 миллион доллари Тожикистон ҳукумати, 70 миллион доллари Қатар ҳукумати томонидан ажратилган.
Изоҳ (0)