“Иккинчи хотинга уйланиш учун биринчисидан рухсат олиш керак” — таниқли қозоқ имоми кўпхотинлилик ҳақида гапирди

Қозоғистонлик имом ва илоҳиёт олими Нурлан Байжигитули “тўқоллар” (иккинчи хотин ёки кичик хотин) ва кўпхотинлилик ҳақида ўз фикрини билдирди.

У агар эркак уйланмоқчи бўлса, биринчи, иккинчи, учинчи хотин бўладими, фарқи йўқ — буни яширмаслиги керак деб таъкидлади. Бу ҳақида “Дарё” мухбири Tengri Life нашрига таяниб хабар бермоқда.

“Ҳозир биз кўраётган нарса – биринчи хотиндан ёки жамоатчиликдан яшириб оила қуриш, инсоннинг нотўғри ҳаёт тарзини олиб бораётганини англатади. Чунки иккинчи бўлиб эрга теккан аёлни энди ҳеч ким ва ҳеч нарса ҳимоя қилмайди. Шунинг учун барибир биринчи хотиннинг рухсати керак. Гарчи Ислом дини буни талаб қилмаса-да”, — дейди имом.

Нурлан Байжигитули аёллар эрининг иккинчи хотини борлигини билиб қолган вазиятларга кўп дуч келади.

“Бу фонда оила парчаланади. Болалар бегона бўлиб қоладилар, жамиятда ўз ўринларини топиб кетишлари қийин бўлади. Демак, бу катта муаммо. Умуман, Қуръони каримда бу ҳақда жуда чиройли оят бор. Аллоҳ таоло Қуръонда: ‘...ўзингизга ёққан аёллардан иккитами, учтами, тўрттами никоҳлаб олинг. Агар адолат қила олмасликдан қўрқсангиз, биттани (олинг)...’, – деди. Юртимиздаги кўп эркаклар эса бу муқаддас оятнинг кўпхотинлилик ҳақида сўз юритувчи биринчи қисминигина ўрганадилар ва шу билан тўхтаб қоладилар” — деди имом.

Нурлан Байжигитули қозоғистонликларга оилавий ришталарни сақлашни маслаҳат берди, чунки бу энг муҳими.

“Агар бирор эркак иккинчисига уйланмоқчи бўлса, бу ошкора бўлиши керак. Шу билан бирга, бой бўлиши керак, токи уларни боқиб, барча зарур нарсалар билан таъминлай олсин”, — дея хулоса қилди Нурлан Байжигитули.

Эслатиб ўтамиз, Қозоғистонда кўпхотинлилик тақиқланган. Нормалар “Никоҳ ва оила тўғрисида”ги қонунда белгилаб берилган. Бунда никоҳ бир эркак ва бир аёл ўртасидаги тенг ҳуқуқли иттифоқ эканлиги белгиланган. Шунга кўра, Қозоғистон Республикаси қонунига кўра, эркак бир неча хотинга эга бўлиши мумкин эмас.

Шу билан бирга, кўпхотинлилик учун маъмурий ёки жиноий жавобгарлик назарда тутилмаган. Шу билан бирга Қозоғистон дунёвий давлат эканлигини таъкидлаш керак. Яъни, дин давлатдан ажратилган.

Талгат Сотиболди, Остона