Александр Лукашенконинг айтишича, Украина қарши ҳужумнинг дастлабки кунларида ўз Қуролли кучлари кўрган йўқотишлардан омманинг эътиборини чалғитиш мақсадида Каховка ГЭСни портлатган. Беларусь раҳбарининг сўзларидан “Белта” иқтибос келтирди.

Каховка ГЭСни ким портлатганини ўзингиз ҳам тахмин қилаётгандирсиз. Ўғрининг шапкаси ёнади, деган гап бор. Бу ҳақда биринчи бўлиб ким дод солди? Шуниси аёнки, Украина томони деярли икки юзта зирҳли техникаси йўқ қилинган ва икки мингдан ортиқ одами ҳалок бўлган уч кунлик “қарши ҳужум”ни яширишга мажбур эди, — деди Лукашенко Коллектив хавфсизлик шартномаси давлатларининг Хавфсизлик кенгаши котиблари йиғилишида. 

Лукашенко Украина армиясининг йўқотишлари ҳақидаги маълумотни қаердан олганига изоҳ бермади.

Беларусь президенти, шунингдек, тўғон бузилиши бўйича АҚШнинг “аниқ, эҳтиёткор” позицияси ҳақида гапирди.

Уларга тан беришим керак. Улар дарҳол: “Буни ким қилганини ҳозирча айта олмаймиз. Биз буни аниқлаб олишимиз керак”, деб чиқишди. Бу нимани англатишини ўйлаб кўринг, —  қўшимча қилди Лукашенко.

6 июнь куни эрталаб Каховка ГЭСнинг тўғони бузилди. Россия бунга Украинанинг ўққа тутишлари сабаб бўлганини даъво қилмоқда. Киев Россия ҳарбийлари тўғонни портлатганини айтмоқда. Бундан ташқари, Каховка сув омборидаги аввалги вайронагарчиликлар ва сув сатҳининг кўтарилиши туфайли тўғон ўз-ўзидан қулаган бўлиши мумкинлиги ҳақида ҳам тахминлар бор.