Хитой мудофаа вазири Ли Шанфу Сингапурда ҳар йили ўтказиладиган “Шангри-Ла диалог” конференциясидаги нутқи чоғида АҚШ мудофаа кучлари ва уларнинг иттифоқчилари Жанубий Хитой денгизи ва унга туташ ҳудудларни тарк этиши кераклигини айтди ҳамда ХХРга нисбатан провокация қилмасликни тавсия қилди. Бу ҳақда The Guardian ёзмоқда.
Унинг сўзларига кўра, АҚШ ва иттифоқчи ҳарбий-денгиз кучлари Хитойга яқин сув ҳудудларда “ҳам денгиздан, ҳам ҳаводан хавфли ва нопрофессионал хатти-ҳаракатларни намоён қилмоқда ва ўз вазифаси билан шуғулланмаяпти”.
У Хитой ҳарбий-денгиз кучлари билан хорижий кемалар ўртасида тез-тез учраётган тушунмовчиликларни тасдиқлади ва булар Хитойга яқин сувларда содир бўлганини таъкидлади.
Ли Шанфу, шунингдек, агар хорижий ҳарбий кемалар Жанубий Хитой денгизи ва унга туташ ҳудудларда жойлаштирилса, Хитой кескин муносабат билдиришда давом этишини айтиб ўтди.
“Дўстлар келса, биз уларни ажойиб вино билан кутиб оламиз. Шоқол ёки бўрилар келса, милтиқ билан”, — деди Хитой мудофаа вазири.
Унинг қўшимча қилишича, Хитой тинч тараққиёт йўлига содиқ қолади, бироқ ўзининг “қонуний ҳуқуқ ва манфаатларини ҳимоя қилишдан тортинмайди”.
Аввалроқ Хитой АҚШнинг Сингапурда бўлиб ўтадиган йиллик хавфсизлик форумида икки давлат мудофаа вазирликлари раҳбарлари Ллойд Остин ва Ли Шанфу ўртасида учрашув ўтказиш ҳақидаги сўровини рад этганди.
Изоҳ (0)