Қашқадарё вилоят ИИБ бошлиғи Шуҳрат Сотволдиевга кўра, Қарши шаҳридаги мавжуд 64 та маҳалланинг 34 фоизи жиноятчилик содир этилишига қараб, “қизил” тоифага кирса, 42 фоизи “сариқ” тоифадаги маҳаллалар ҳисобланади. Бу ҳақда масъул криминоген вазият секторлар кесимида Халқ депутатлари шаҳар кенгаши депутатлари иштирокида ўтказилган муҳокама йиғилишида гапирган.
Таъкидланишича, муҳокама йиғилишида вилоят ИИБ бошлиғи, вилоят суди, вилоят прокуратураси раҳбарлари иштирок этган бўлиб, унда 2023 йилнинг тўрт ойида содир этилган жиноятчилик масалалари муҳокама қилинган.
“Тадбирни Қашқадарё вилоят ИИБ бошлиғи полковник Шуҳрат Сотволдиев очиб, Қарши шаҳар ҳудудида жорий йилнинг тўрт ойи давомида жамоат хавфсизлигини таъминлаш, криминоген вазият — жиноятчиликнинг олдини олиш ва рўй берганларини фош этиш, қидирувдаги шахсларни топиб, жиноятга жазо муқаррарлигини таъминлаш бўйича амалга оширилган ишлар ва бу борада йўл қўйилган камчиликларни атрофлича таҳлил этди.
Таҳлилларга кўра, Қарши шаҳрида жорий йилнинг тўрт ойида умумий жиноятлар фуқаролар ўртасида ва оила турмуш доирасидаги ўзаро жанжаллар натижасида юз берган. Айнан шу турдаги жиноятларнинг содир этилганлигига қараб, Қарши шаҳридаги 64 та маҳаллалардан 34,4 фоизи ‘қизил’ ва 42,2 фоизи ‘сариқ’ тоифадаги маҳаллалар рўйхатида тургани ачинарли ҳолатлиги гапирилди. ‘Қизил’ тоифадаги маҳаллалар биринчи секторда 6 та, иккинчи секторда 4 та, учинчи секторда 7 та, тўртинчи секторда 5 тани ташкил этиши очиқланди”, — дейилади вилоят ИИБ ахборот хизмати тарқатган маълумотда.
Йиғилишда айтилишича, мазкур ҳолатлар, оила-турмуш муносабатлари доирасидаги жиноятларнинг олдини олиш бўйича маҳаллалардаги “Бешлик” тизими ҳамда бошқа тегишли мутасадди ташкилотлар вакиллари томонидан етарли даражада профилактик ишлар амалга оширилмаганлигини кўрсатмоқда.
“Бунинг учун жиноятчилик ва ҳуқуқбузарликларнинг олдини олиш, унга қарши курашиш, жамоат хавфсизлигини таъминлаш мақсадида ҳар пайшанба куни вилоятдаги барча ташкилот, муассаса ва идораларда ‘Ҳуқуқбузарликлар профилактикаси куни’ тадбирлари ўтказиб борилиши белгилаб берилган. Шу сабабли, ‘Ҳуқуқбузарликлар профилактикаси куни’ тадбирини самарали олиб бориш, амалга оширилган ишларни таҳлил этиб, ўтказилаётган ‘Хавфсиз ҳудуд’, ‘Турмуш’, ‘Ўсмир’ ва бошқа профилактик тадбирларда барча мутасадди ташкилотлар ва ҳуқуқни муҳофаза қилувчи органлар ҳамжиҳатликда иш ташкил этиб, ўзаро ҳамкорликни таъминлаши зарурлиги иштирокчиларга уқтирилди.
Шаҳар ҳудудида содир этилган оғир турдаги қотиллик, тан жароҳати етказиш ва безорилик билан боғлиқ, ишга ва ўқишга киритиб қўйиш ҳамда уй-жой олиб бериш билан боғлиқ ҳолатлар фирибгарлик, кибер маконда содир этилаётган жиноятларнинг олдини олиш мақсадида маҳалла ва ташкилотларда профилактик ишларни кучайтириш, ОАВларда кўрсатувлар орқали жиноятларнинг салбий оқибатларини тарғиб этиш лозимлиги айтилди”, — дейди вилоят ИИБ ахборот хизмати раҳбари Жавлон Бахтиев.
Қўшимча қилинишича, Қаршидаги жиноятларнинг барчаси ўзаро оилавий келишмовчиликлар ва низолар орқали келиб чиққан.
“Келгусида, оила-турмуш доирасидаги жиноятларнинг олдини олиш мақсадида низоли оилалар, ҳуқуқбузарлик содир этиб маъмурий жавобгарликка тортилган шахсларнинг рўйхатларини шакллантириб, улар билан кенг жамоатчилик вакиллари иштирокида профилактик тадбирларни кучайтириб, ушбу оилалардаги аёлларга ‘Ҳимоя ордери’ни бериш, мунтазам равишда спиртли ичимлик оқибатида ҳуқуқбузарлик содир этилаётган оилаларда ижтимоий-маънавий, тарбиявий муҳитни ва соғлом турмуш тарзини яратишда уларга ҳуқуқий маслаҳатлар, ижтимоий ёрдамлар кўрсатиш ва иш билан банд бўлмаганларини иш билан таъминлаш чораларини кўриш бугунги кун талаби. Хулоса қилиб айтганда, жиноятларни барвақт аниқлаб олдини олиш ва ҳуқуқбузарликлар профилактикаси соҳасида ишларни тизимли ташкил этиш борасида сектор раҳбарлари олдига аниқ вазифалар қўйилди. Бу борада Йўл харитаси тузиб, амалга ошириш мажбурияти юкланди”, — дейди масъул.