Шу кунларда иссиқ об-ҳаво поездлардан фойдаланаётган йўловчиларга ноқулайликлар келтирмоқда. “Ўзтемирйўлйўловчи” йўловчи вагонларни янгилаш ҳамда совитиш тизими билан жиҳозлаш борасида олиб борилаётган ишлар тўғрисида маълумот берди.
Маълум қилинишича, йўловчи вагонларни совитиш тизими билан жиҳозлаш жуда катта сармоя талаб қилинади, совитиш тизими билан жиҳозлаш имконияти мавжуд бўлмаган вагонларни янгисига босқичма-босқич алмаштирилмоқда. Жумладан, 2023—2024 йилларда 130 та янги совитиш тизими билан тўлиқ жиҳозланган вагонларни харид қилиш режа қилинган.
Бундан ташқари, “Ўзбекистон темир йўллари” 34 та замонавий йўловчи электропоездлар харид қилиш бўйича тендер эълон қилган.
Ҳозирги кунда йўловчилар ташишда 335 та вагонлардан фойдаланилмоқда, шундан 235 таси кондиционер тизими билан, 100 таси эса ҳаво алмаштириш (вентиляция) тизими билан жиҳозланган.
Шунингдек, қайд этилишича, йўловчилар томонидан тушунмовчиликлар келиб чиқишини олдини олиш мақсадида ҳозирги кунда совитиш тизими мавжуд бўлган ҳамда ҳаво алмаштириш тизими билан жиҳозланган купе туридаги вагонлардаги чипта нархида тафовут мавжуд бўлиб, чипта харид қилинган вақтда вагонларда совитиш тизими мавжуд ёки мавжуд эмаслиги ҳақида касса ходимлари ахборот беради.
Агар электрон чипта харид қилинаётган бўлса, у ҳолда тизимда вагонларда совитиш тизими мавжуд ёки мавжуд эмаслиги ҳақида махсус белги қўйилади.
Изоҳ (0)