Петербург халқаро иқтисодий форумида тарихда биринчи марта етакчи ғарб оммавий ахборот воситалари вакиллари қатнашмайди. Бу ҳақда The Bell интернет-нашри хабар берди.
Таҳририят сўровига кўра, Кремль матбуот котиби Дмитрий Песков Россия расмийлари “бу йил дўст бўлмаган мамлакатлар журналистларини аккредитациядан ўтказмаслик тўғрисида” қарор қабул қилганини тасдиқлади. Россияда “дўст бўлмаган” давлатлар — бу Москвага қарши санкциялар қўйган ёки уларни қўллаб-қувватлаган мамлакатлардир. Ҳозирги вақтда ушбу рўйхатга Европа Иттифоқининг барча мамлакатлари, шунингдек, Австралия, Альбания, Андорра, Буюк Британия (жумладан, Жерси, Ангуилла, Британия Виржиния ороллари, Гибралтар), Исландия, Канада, Лихтенштейн, Микронезия, Монако, Янги Зеландия, Норвегия, Корея Республикаси, Сан-Марино, Шимолий Македония, Сингапур, АҚШ, Тайван, Украина, Черногория, Швейцария ва Япония киради.
Петербург халқаро иқтисодий форуми 2023 йил 14 июндан 17 июнгача бўлиб ўтади. Унинг мавзуси “Суверен тараққиёт – адолатли дунё пойдевори, келажак авлодлар учун кучларни бирлаштирайлик”. Қайд этилишича, маърузачилар рўйхатида файласуф Александр Дугин, актёр Владимир Мошков, шунингдек, пранкерлар Вован ва Лексус бор.
Изоҳ (0)