Сўнгги вақтларда мамлакатимизда қишлоқ хўжалиги ерларининг самарадорлигини оширишга, ушбу жараёнларда эса сувни тежайдиган технологияларни қўллашга алоҳида эътибор қаратилмоқда.
Айнан ушбу йўналишда 2023 йил 18 апрель куни президент Шавкат Мирзиёев бошчилигида ўтказилган йиғилишда сув тежовчи технологияларни жорий этиш масаласи танқидий муҳокама қилинганди.
Ўтган даврда қишлоқ хўжалигида сув тежовчи технологияларни жорий қилиш учун 5 трлн сўм кредит ажратилган бўлиб, маблағлар ҳисобига 1 млн гектарда сув тежовчи технологиялар жорий қилинган бўлса-да, соҳада қатор камчиликлар мавжудлиги қайд этилган.
Хусусан, сувни тежайдиган суғориш тизимларини ишлаб чиқариш, етказиб бериш, харид қилиш, жойларда лойиҳалаштириш ва ўрнатишдаги камчиликлар ҳамда айрим қишлоқ хўжалиги маҳсулотлари ишлаб чиқарувчиларнинг бу борадаги кўникмалари етарли эмаслиги мазкур технологияларнинг ўз вақтидан кечикиб жорий қилинишига сабаб бўлмоқда.
Юқоридаги мавжуд мавжуд камчилик ва муаммоларни бартараф этиш, минтақадаги сув танқислигининг салбий таъсирини юмшатиш, сув ресурсларидан янада самарали фойдаланиш мақсадида, президентнинг бевосита ташаббуси билан “Агробанк” томонидан “Сувчилар мактаби” ташкил этилди.
“Сувчилар мактаби” лойиҳаси Сув хўжалиги вазирлиги, Тошкент ирригация ва қишлоқ хўжалигини механизациялаш муҳандислари институти” Миллий тадқиқот университети билан ҳамкорликда йўлга қўйилди.
Мазкур мактабда қишлоқ хўжалигида сувдан фойдаланиш маданиятини ошириш, сув тежовчи технологиялардан фойдаланишнинг илғор усуллари бўйича билимлар берилади. Ўқув жараёнлари мултимайдон шаклида, ҳам назарий ҳам амалий шаклда — ўқув хоналарида ва даланинг ўзида ҳам ўтказилиб, тингловчиларга бир нечта мавзулар бўйича малакавий дарслар ўтилади.
Ўқув мавзуларида, сувдан тежовчи технологиялар турлари, афзалликлари ва уларнинг самарадорлиги, соҳадаги хорижий тажриба ҳамда замонавий суғориш тизимининг аҳамияти ва сувдан фойдаланиш маданияти Туркия мисолида ўргатилади.
Бундан ташқари, иқтисодий ва ҳуқуқий саводхонлик бўйича дарсларда субсидия, кафилликлар, солиқ имтиёзлари ва банк кредитлари бўйича билимлар берилади.
Таъкидлаб ўтиш лозимки, “Сувчилар мактабига” 60 мингта фермер хўжалиги, 4 мингга яқин сув хўжалиги хизмати ходимлари, бир минг нафардан ортиқ банк ходимлари жалб қилинади. Шунингдек, жойларда ўқувларни ташкил қилиш учун бутун республика бўйлаб 5 та сайёр гуруҳлар ташкил этилади.
Мактаб билан боғлиқ барча харажатлар “Агробанк” томонидан молиялаштириладиган бўлиб, дастлабки босқич учун 26 млрд сўм маблағ ажратилган.
Мактабнинг очилиш маросимида қатнашган “Агробанк” АТБ бошқаруви раиси Рустам Маматкулов, жумладан шундай деди:
— Қишлоқ хўжалигини молиялаштирувчи тижорат банки вакили сифатида сувдан оқилона фойдаланишни қўллаб- қувватлашда катта масъулиятимиз бор. Хусусан, президентнинг ушбу йўналишда Агробанкка муҳим вазифаларни белгилаб бердилар. Ушбу вазифалардан келиб чиқиб, қишлоқ хўжалиги соҳасида сувдан оқилона фойдаланиш бўйича билим ва кўникмаларни оширишга қаратилган “Сувчилар мактаби”ни ташкил қилдик.
Қайд этилганидек, сув тежовчи технологиялар жорий қилиш бўйича ажратиладиган кредитларни электрон шаклга ўтказган ҳолда сувкредıt.uz платформаси фаолияти йўлга қўйилади.
Ўқув курсларини тугатганларга ушбу платформа орқали қисқа муддатларда кредит олиш жорий қилинади ҳамда сервис хизматлари кўрсатиш ташкил этилади.
Сув хўжалигини ислоҳ қилиш борасида Исроил, Туркия, Испания ва Хитойдан тажрибали мутахассислар жалб қилиниб борилади.
Реклама ҳуқуқи асосида.