Швейцария парламенти — Миллий кенгаш учинчи давлатларга Швейцарияда ишлаб чиқарилган қуролларни Украинага топширишга рухсат бериш ҳақидаги “Lex Ukraine” номли қонун лойиҳасини рад этди. Парламент расмий сайтининг хабар беришича, 98 нафар депутат ҳужжатга қарши овоз берган бўлса, 75 нафари уни ёқлаб чиққан.

Аввалроқ Берн ҳукумати (Федерал Кенгаш) Германия, Испания ва Даниянинг Украинага қурол бериш сўровларини рад этган ва мамлакатнинг уруш материаллари тўғрисидаги қонунига асосланиб, уруш зоналарига қурол етказиб беришни тақиқлаган эди.

Швейцария Федерал Кенгаши мамлакатда ишлаб чиқарилган қуролларни фақат алоҳида ҳолларда, масалан, Бирлашган Миллатлар Ташкилоти Хавфсизлик Кенгаши Россиянинг Украинага қарши урушини қоралаган тақдирдагина реэкспортга рухсат бериши мумкин. Бироқ бу вариант истисно қилинган, чунки Россия Федерацияси БМТ Хавфсизлик Кенгашидаги қарорларга вето қўйиш ҳуқуқига эга.

Шу билан бирга Европа Иттифоқи мамлакатлари Берндан қурол-яроғ реэкспорт қилишга қўйилган тақиқнинг юмшатилишини истамоқда. Швейцария парламентарийларининг бу борадаги фикрлари иккига бўлинган. Мамлакатнинг ўнг марказчи Эркин демократик партияси етакчиси Терри Буркарт Киевга қурол етказиб беришдан бош тортиш Москвани қўллаб-қувватлашни англатишини айтган. “Биздаги вето ҳуқуқи бошқаларнинг Украинага ёрдам беришига тўсқинлик қилмаслиги керак”, — деганди у.

Қишда ўтказилган сўровномада мамлакатдаги респондентларнинг ярмидан кўпи (55 фоизи) Украинага қурол-яроғ реэкспорт қилинишига рухсат бериш тарафдори эканини билдирган. Ўз навбатида Швейцария Халқ партияси депутати Дэвид Цубербюлер  қуролли тўқнашувда иштирок этаётган давлатга қурол жўнатишига рухсат бериш Швейцариядаги “тинчлик ва фаровонлик пойдеворини йўқ қилишини” айтган.