Ўзбекистон Марказий банки ижтимоий тармоқларда банклар устав капиталининг энг кам миқдори бўйича қўйилган талабларга саккизта банкнинг капитали жавоб бермаслиги ҳақида тарқалган хабарларга муносабат билдирди.
Қайд этилишича, “Банклар ва банк фаолияти тўғрисида”ги қонунининг 13-моддасига киритилган ўзгартиришларга кўра, банк устав капиталининг энг кам миқдори 2023 йил 1 сентябрдан бошлаб 200 миллиард сўмни ва босқичма-босқич 2025 йил 1 январдан 500 миллиард сўмни ташкил этиши лозимлиги белгиланган.
Иқтисодчи Отабек Бакиров қатор банклар ҳозирда бу талабларга жавоб бермаслигига эътибор қаратди.
“1 май ҳолатига камида 8 та банк яна уч ойдан кейин кучга кирадиган талабларга жавоб бермайди. Шулардан ‘Poytaxtbank’, ‘Равнақ банк’, ‘Мадад инвест банк’ ва ‘Ўзагроэкспортбанк’ кеча ташкил бўлган эмас, эски банклар”, — деб ёзди у.
Марказий банкка кўра, қонун лойиҳаси ишлаб чиқилаётган вақтда, тижорат банкларига устав капиталини белгиланган миқдорга етказиш бўйича аниқ чораларни белгилаш ва унинг ижросини таъминлаш юзасидан тегишли кўрсатмалар берилган.
“Устав капитали миқдори белгиланган минимал талабларга жавоб бермайдиган банкларга нисбатан қонун ҳужжатларига асосан бошқа банкларга қўшилиш тавсия этилади, акс ҳолда улардан банк фаолиятини амалга ошириш ҳуқуқини берувчи лицензияси чақириб олинади”, — дейилади муносабатда.
Ўзбекистонда банкларнинг устав капиталининг энг кам миқдорини ошириш таклифлиги 2022 йил октябрда муҳокамага қўйилган эди. Сенат бу борадаги қонунга ўзгартириш киритишни 2023 йил апрель бошларида маъқуллаган. Апрель охирида эса президент томонидан имзоланган қонун билан “Банклар ва банк фаолияти тўғрисида”ги қонунга ўзгартиш киритилган.
Изоҳ (0)