Немис илдизларига эга ҳинд гўзали Дия Мирза 18 ёшидаёқ “Осиё гўзали” унвонини қўлга киритади. 19 ёшида эса у Болливудда “Юрагимдасан” фильмида дебют қилади, томошабинлар уни Аишвария Райнинг ёшлигига ўхшатишади. Кейинчалик Дия бир неча бор актриса Энн Хетеуэй билан таққосланди, аммо доимий таққослашларга қарамай, қиз бу соҳада ўз йўлини топишга муваффақ бўлди.
Дия Мирза (қизлик фамилияси Ҳендрич) 1981 йил 9 декабрда Жанубий Ҳиндистонда, Ҳайдарободда туғилган. Унинг отаси Франк Ҳендрич немис меъмори ва график дизайнери бўлиб, бутун дунё бўйлаб саёҳат қилиб, ўз касбини бошқаларга ўргатган.
Деҳлига бўлган шундай саёҳатлардан бирида у Дипа исмли бенгал қиз билан танишади. Қизиғи шундаки, Дипа немис тилини ўрганган ва бу тилда бемалол гапирар, ўқир ва ёзишни биларди.
Ёшлар бир-бирига кўнгил қўйгач, турмуш қуришади. Тез орада уларнинг узоқ кутилган ва ягона қизи туғилади, унга Дия деб исм қўйишади. Қиз тўрт ярим ёшга тўлганда ота-онаси ажралишади. Кейин иккаласи ҳам янги оила қуради, лекин фарзанд кўрмасликка қарор қилишади.
Диянинг отаси у 9 ёшлигида вафот этди. Онаси мусулмон эркак Аҳмад Мирзага турмушга чиқади ва қиз ўгай отасининг фамилиясини олади. “Мен иккинчи дадамни ўгай ота деб аташни ёмон кўраман. Тўғри, у биологик отам эмас, лекин у ҳақиқий отасининг ўрнини эгаллашга уринмаган ажойиб, фантастик дада эди! Афсуски, у ҳам 2003 йилда вафот этди”, — дейди Дия.
Дия оилада ягона фарзанд бўлишига қарамай, ҳеч қачон талтайиб кетмаган. Онасининг дугонаси қўнғироқ қилиб, Дия гўзаллик танловида қатнашишини сўраганида, онаси бунга кескин қаршилик қилади. У қизининг Бангалордаги ҳуқуқшунослик мактабига боришини хоҳларди, лекин иккинчи эри уни қизига рухсат беришига кўндиради.
Аввалига Дия “Ҳиндистон гўзали-2000” танловида иштирок этади ва учинчи ўринни эгаллайди. Кейин эса “Осиё гўзали” танловида ғолибликни қўлга киритади. 2000 йил Ҳиндистон учун зафарли йил бўлади. Ҳинд гўзаллари барча халқаро танловлардан тож олиб келишади: Лара Датта “Коинот гўзали”, Приянка Чопра “Дунё гўзали”, Дия Мирза эса “Осиё гўзали” унвонига сазовор бўлди.
Оддий ўсмир қиздан Дия бирдан гўзаллик маликасига айланади ва катта эътиборга сазовор бўлади. Болливуд режиссёрлари кетма-кет фильмларда рол ўйнашни таклиф қила бошлайдилар. Дия ўзининг дебютини Гаутам Меноннинг “Юрагимдасан” романтик драмасида Мадхаван ва Саиф Али Хон билан партнёрликда ўйнайди.
.jpg)
Чиқарилган пайтда тижорий муваффақиятга эришмаганига қарамай, фильм йиллар давомида култ классикасига айланди.
Гўзал Дия Болливуднинг топ актрисалари рўйхатига кириш учун барча имкониятларга эгадек эди. Лекин бундай бўлмади. Баъзи таҳлилчилар бунга қизнинг Аишвария Рай билан ўхшашлиги сабаб бўлган деб ҳисоблайди. Танқидчилар баъзида Мирзани Райга тақлид қилганликда айблашади — ҳафсаласи пир бўлган Дия эса интервьюларида у Ашга тақлид қилмаганини қайта-қайта таъкидлайди.
Дия “Муҳаббат шайдоси”, “Фақат сен”, “Оилали аёл” каби романтик фильмларда суратга тушган. Йиллар давомида янада жиддий ролларни ижро этади. 2018 йилда Мирза энг кўп даромад келтирган ҳинд фильмларидан бири бўлган “Санжу” биографик фильмида Санжай Даттнинг рафиқаси образини яратади.
2020 йилда у “Тарсаки” драмасида рол ўйнайди ва “Йилнинг энг яхши фильми” учун Filmfare мукофотини қўлга киритади.
2014 йилнинг кузида мафтункор Дия бизнесмен Саҳил Сангҳага турмушга чиқади, аммо беш йилдан сўнг эр-хотин ажралишади. 2021 йил 15 февралда Мирза яна турмушга чиқади — бу сафар тадбиркор Ваибхав Рекҳага.
Тўйидан уч ой ўтгач, ўғли Авяан Азаад дунёга келади. Иккинчи эрининг биринчи турмушидан Самаира исмли қизи ҳам бор.
Ҳозирда Дия кўп вақтини оиласига бағишлайди, лекин карьерасини ҳам унутмайди. 2021 йилда у “Агентимга қўнғироқ қилинг: Болливуд” веб-сериалида рол ижро этди. Шунингдек, актриса яқинда экранларга чиққан Ражкумар Рао ижросидаги “Оломон” номли драмада ҳам иштирок этди.
Изоҳ (0)