Қашқадарё вилоятида Ички ишлар ходимларининг навбатчи айблови — Маъмурий жавобгарлик тўғрисидаги кодекснинг 183-моддаси, яъни майда безориликда айбланган блогерлар 5 суткага қамалганди. Суд жараёнидан хабардор “Дарё” манбасининг билдиришича, суд бодикамера ёзувларини кўрмай, қарор чиқарган.
“Умид (Капитан Каримов назарда тутилмоқда. Таҳририят изоҳи) судда бодикамера ёзувлари кўрилмаганидан норози бўлди. У судга киришидан аввал ҳам умуман айби йўқлигини, Ички ишлар ходимларига бу тўхтаб турган машина-ку, деб гапиргани учун айбдорга чиқарилаётганини айтганди”, — дейди вазиятдан хабародор бўлган блогер Азизбек Яздурдиев.
Вилоят Ички ишлар бошқармаси маълумотига таянилса, 29 май куни тахминан соат 10:20 ларда Шаҳрисабз шаҳар ИИБ, ЙҲХБ ходимлари “Пиллакашлик” маҳалласининг Пиллакашлик кўчасида 2 та автомобиль давлат рақамисиз, ойналари тўлиқ қорайтирилган ҳолда турганини кўрган. Шунда мазкур Gentra русумли автомашиналарга нисбатан ҳужжатларни расмийлаштириш ишлари бошланганда транспорт воситалари ҳайдовчилари ички ишлар органлари ходимларининг қонуний талабларини бажармасдан жанжал чиқариб, оммани ўзига қаратган.
Блогерлар Мақсуд Музаффаров ҳамда Умид Каримовлар билан боғлиқ мазкур вазият ҳақида қисқа фурсатда ҳужжатлар расмийлаштирилиб, Жиноят ишлари бўйича Шаҳрисабз шаҳар судига юборилган.
.jpg)
Суднинг 2023 йил 29 май кунидаги қарорига кўра, блогерлар ва уларнинг шериги Маъмурий жавобгарлик тўғрисидаги кодекснинг бир нечта моддалари билан айбдор деб топилган ва уларнинг ҳар бирига 5 суткадан маъмурий қамоқ жазоси тайинланган.
“Дарё” блогерлар иши кўриб чиқилган судда блогер Капитан Каримовнинг талаби — бодикамера ёзувлари кўздан кечирилганми ёки йўқми, видеолар инобатга олинганми, деган саволларга аниқлик киритиш учун вилоят ИИБ ҳамда вилоят суди масъулларидан жавоб олишга уринди.
Вилоят ИИБ ахборот хизмати раҳбари Жавлон Бахтиев бодикамералардаги мавжуд видеоларни кўрмаганини, суд ишида мазкур видеолар тақдим қилинган ёки қилинмаганидан хабари йўқлигини билдирган бўлса, вилоят суди ахборот хизмати раҳбари Фарҳод Маҳмудов эса “Дарё”нинг бу ҳақдаги саволига жавобан бодикамералардаги видеолар ҳақида суд материалларида кўрсатилмаганини маълум қилди.
Масъуллар берган жавобдан англашилишича, судда катта эҳтимол билан блогерлар ва ИИБ ходимлари мулоқоти акс этган бодикамера видеотасвирлари кўрилмаган.
“Судда бодикамера ёзувлари кўрилмаган бўлса, суд ҳужжатларида қандай қилиб блогерлар ИИБ ходимларини сенсираган, уларни ҳақорат қилган, обрўсизлантирган деган хулосалар бериляпти? Суд гувоҳлар, жавобланувчилар ва гумондорларни эшитиб, улар тақдим қилган далилларга асосланиб, қарор қабул қилмайдими?” — дейди блогер Азизбек Яздурдиев мазкур воқеа ҳақида фикр билдирар экан.
“Дарё”нинг яна бир манбаси эса бодикамералардаги видеоларни кўрганини, унда блогерлар ҳақиқатан ҳам Ички ишлар ходимлари билан тортишгани акс этганини айтмоқда.
“Бодикамерадаги видеоларни кўриб чиқдим. Ҳақиқатан ҳам видеода Умид ва Мақсуд ИИБ ходимлари билан тортишгани кўринган. Лекин ЙҲХБ бошлиғи бу видеоларни ҳеч қаерга бермаяпти. Фақат кеча судга тақдим қилинган экан”, — дейди манба.
Жамоатчилик блогерлар майда безориликда, ИИБ ходимларига бўйсунмаганликда айбланаётган бўлса, нега бодикамералар видеоси оммага намойиш қилинмаяпти, деган саволларни бермоқда. “Дарё” жамоатчиликни қизиқтираётган видео ҳақида Ички ишлар вазирлиги ахборот хизмати раҳбари Шоҳрух Ғиёсов билан боғланиб, ЙПХ инспекторининг бодикамерасига тушган видеотасвирларни олиш тартиби қандайлиги билан қизиқди.
“Судга расмий хат билан чиқиш керак”, — дейди Шоҳрух Ғиёсов ЙПХ инспекторларининг бодикамерасидаги видеоларни олиш ҳақида гапирар экан. Вилоят суди ахборот хизмати раҳбари Фарҳод Маҳмудов эса “Агар бодикамера тасвирлари керак бўлса, ИИБдан хат орқали олсангиз бўлади”, — деди.
“Дарё” воқеалар ривожини кузатишда давом этади.
Изоҳ (0)