Тошкент шаҳри ва Вьетнамнинг Нячанг шаҳарлари ўртасида доимий авиарейслар қатнови йўлга қўйилади. Бу ҳақда Маданият ва туризм вазирлиги ахборот хизмати хабар берди.
Унга кўра, 29 май куни Тошкент шаҳрида жойлашган International Tashkent Hotel меҳмонхонасида Ўзбекистон ва Вьетнам давлатлари туризм тадбиркорларининг икки томонлама очиқ мулоқоти ўтказилди. Тадбир Ўзбекистоннинг Prestige Travel туристик компанияси ташаббуси билан Маданият ва туризм вазирлиги ҳамкорлигида ташкил этилди.
Унда Маданият ва туризм вазирлигининг масъул ходимлари икки давлатнинг етакчи меҳмонхона брендлари ва туризм компаниялари раҳбарлари, жумладан, Prestige Travel компанияси асосчиси Ойбек Аҳмедов, Вьетнамнинг VinGroup корпорацияси асосчиси ҳамда Вьетнамдаги йирик VinPearl меҳмонхоналар тизими раҳбари Александра Нгуен ва Аmegа Travel Vietnam компанияси бошқарув раиси Соня Нгуен Тҳи Хуан иштирок этди.
Қайд этилишича, бугунги кунда Ўзбекистон ва Вьетнам ўртасида икки томонлама савдо-иқтисодий ва инвестицион ҳамкорлик кенгайиб бормоқда. Жумладан, икки давлатлар ўртасида сайёҳлар оқими ҳам аввалги йилларга нисбатан кескин ортди. 2022 йилнинг якунларига кўра, Вьетнамдан Ўзбекистонга 10 минг нафар сайёҳ кириб келган.
2023 йилнинг июнь ойидан бошлаб Ўзбекистон ва Вьетнамнинг Нячанг шаҳарлари ўртасида доимий тўғридан тўғри авиарейслар қатнови йўлга қўйилмоқда. Бу икки мамлакат туризм соҳасида фаолият кўрсатаётган тадбиркорлар учун янги имконият ва муҳим қулайликлар яратиши таъкидланди.
Изоҳ (0)