Boeing ва Airbus’га рақиб: Хитойнинг C919 йўловчи самолёти илк парвозни муваффақиятли амалга оширди

Хитойда ишлаб чиқарилган янги C919 катта сиғимли йўловчи самолёти биринчи тижорий парвозини муваффақиятли якунлади. Самолёт Шанхайдан Пекинга борди, деб хабар бермоқда BBC.

Самолёт Хитой тижорий авиация корпорацияси (Comac) томонидан ишлаб чиқарилган. У Airbus ва Boeing самолётларининг бозордаги доминантлигига барҳам бериш умидида ишлаб чиқилган (Россиянинг Sukhoi Superjet 100 самолёти ҳам шунга даъво қилмоқда).

Бироқ Хитойнинг 164 ўринли ушбу самолёти Ғарб компонентларига, жумладан двигателлари ва авионикасига (бортдаги парвоз ва навигация электрон тизимлари тўплами) деярли бутунлай қарам.

Шанхайдан Пекинга парвоз уч соатдан камроқ вақт олди. Самолёт бортида 130 нафар йўловчи бўлган.

“Мамлакатимиз имкониятларига мутлақ ишонаман”, — деди рейс йўловчиларидан бири Лю Пен Reuters агентлигига. “C919 ҳали янада яхшиланади”.

Давлат томонидан қўллаб-қувватланадиган China Eastern Airline бугунга қадар шундай самолётлардан бештасига буюртма берган. Comac биринчи беш йилда йилига 150 та самолёт ишлаб чиқаришни режалаштирмоқда. Шунингдек, у ҳозиргача C919 учун 1 200 дан ортиқ буюртма олганини даъво қилмоқда. Бироқ айрим экспертларнинг фикрича, бу буюртмаларнинг аксарияти чинакам эмас, балки Хитой авиаташувчиларининг қизиқиш билдиришидир.

Бир неча йил олдин C919 самолёти кабинасига чиқиб кўрган Хитой раиси Си Цзиньпин лойиҳани Хитойнинг энг инновацион ютуқларидан бири деб атаганди. C919 2017 йилда илк синов парвозини амалга оширган ва ўшандан бери яна бир нечта синовлар ўтказган.

У Хитойнинг биринчи реактив самолёти — АРJ21 дан анча узоқроқ масофага уча олади ва кўпроқ йўловчиларни ташийди.