АҚШ президенти Жо Байден ва Вакиллар палатаси спикери Кевин Маккарти мамлакатнинг давлат қарзи чегарасини ошириш бўйича якуний келишувга эришди. Бу ҳақда ҳар икки сиёсатчи 29 майга ўтар кечаси маълум қилди. Reuters хабарига кўра, тегишли ҳужжат 2025 йилнинг 1 январига қадар давлат қарзининг юқори чегарасини оширишни назарда тутади, у эса ҳозирда қарийб 31,4 триллион долларни ташкил этади.
АҚШ раҳбарининг сўзларига кўра, 99 саҳифалик якуний ҳужжатда унинг “устувор йўналишлари ва ютуқлари” инобатга олинади, фахрийлар, кексалар ва кам таъминланган оилаларни қўллаб-қувватлашни қисқартириш бўйича талаблар рад этилади, шунингдек, Байден ва АҚШ вице-президенти Камала Харрис томонидан илгари сурилган “талабалик кредити” қарзини енгиллаштириш ташаббуси қўллаб-қувватланади.
“Бу келишув Америка халқи учун яхши янгилик”, — деди Оқ уй раҳбари бутун дам олиш кунлари давом этган музокаралардан сўнг.
Маккартининг айтишича, АҚШ бюджетидаги харажатлар барибир қисқаради — умумий маънода ҳам, миллий мудофаа билан боғлиқ бўлмаган соҳаларда ҳам. Маккартининг таъкидлашича, сўнгги марта давлат қарзининг юқори чегараси бир неча марта оширилганда, томонлар бюджет тақчиллигини камайтиришга келишиб олганди. Бундан ташқари, ҳужжат кам даромадли америкаликларга озиқ-овқат ёрдами дастурлари учун янги талабларни белгилайди — хусусан, улар учун қўшимча иш талаблари пайдо бўлади.
Маккарти ва Байден ҳужжат бир овоздан қабул қилинишини кутмаяпти
Келишув кучга кириши учун ҳужжат АҚШ Конгрессининг иккала палатаси томонидан маъқулланиши керак — бу 5 июнгача, мамлакат Молия вазирлиги инвесторлар олдидаги мажбуриятларини бажариш учун пул етишмаслиги ҳақида эълон қилиши кутилаётган санагача амалга ошиши керак. Шу билан бирга, вакиллар палатасида қарз потологини ошириш бўйича баҳслар бўлиб ўтмоқда. Молия вазири Жанет Йеллен бу чорани январь ойидаёқ тавсия қилган эди.
Ҳужжатнинг қабул қилинишига муросасиз республикачиларнинг бир қисми ҳам, айрим илғор демократлар ҳам қарши. Бироқ Сенатдаги Республикачилар етакчиси Митч Макконнелл келишувни олқишлади ва уни ортиқча кечиктирмасдан қабул қилишга чақирди. Маккарти, шунингдек, Вакиллар палатасида республикачиларнинг 95 фоиздан ортиғи келишувга ижобий муносабатда, деб ҳисоблайди.
Изоҳ (0)