Ёшлар ишлари агентлиги якшанба куни телефон қўнғироқларига жавоб бермагани учун ходимларидан тушунтириш хати талаб қилган ва ёздирган мансабдори — агентликнинг Самарқанд вилояти бошқармаси бошлиғига огоҳлантириш берди. Бу ҳақда “Дарё”га агентлик ахборот хизмати хабар берди.
“Амалдаги қонунчилик ҳужжатлари ҳамда янги таҳрирдаги Меҳнат кодексига биноан ходимларни дам олиш кунлари меҳнатга жалб қилиш тақиқланган. Ёшлар ишлари агентлиги тизимида фаолият юритаётган барча ходимларнинг дам олиш кунларида дам олиши ва оила даврасида бўлиши қадрланади. Юқоридагиларни инобатга олиб, ташкилотнинг Самарқанд вилояти бошқармаси раҳбари хизмат фаолияти таҳлил қилиниб, якшанба дам олиш куни бўлишига қарамасдан, меҳнат интизомига амал қилмагани учун қатъий огоҳлантирилди”, — дейилади агентликнинг расмий муносабатида.
Агентлик ахборот хизмати мазкур ҳолатга эътиборсиз бўлмаган жамоатчилик вакиллари ва ОАВга миннатдорлик изҳор қилган.
“Фаолиятимизга бефарқ бўлмаган барча ОАВ, жамоатчилик вакиллари ва мустақил блогерларга ўз миннатдорчилигимизни билдирамиз”, — дейилади агентлик масъуллари расмий ахборотида.
Изоҳ (0)