Ташқи кўриниши туфайли рад этилган бўлса-да, истеъдоди билан муваффақиятга эришган ўзбек шоу-бизнеси вакиллари

Санъат соҳасида ташқи кўриниш муҳим аҳамиятга эга, дейишади. Аммо бу ташқи кўриниш ижодкорнинг маҳоратини белгилайди, дегани эмас. Қуйида ташқи кўриниши туфайли рад этилган бўлса-да, тинимсиз меҳнат эвазига муваффақият қозонган машҳурлар ҳақида ҳикоя қилинади. 

Нилуфар Сотиболдиева: “Дилдора Рустамовадек чиройли эмассан, дейишган”

— Институтни битириш арафасида ўзимни телевидение соҳасида синаб кўришга қарор қилганман. “Давр” информацион кўрсатувининг инглиз тили редакциясига иш сўраб борганимда талаффузим уларга маъқул бўлмаган. Телеканалларда ўтказиладиган жуда кўп кўрсатувлар кастингида иштирок этганман. Аммо бирортасида яхши натижага эришмаганман. Бир куни Дилдора Рустамова студияга кириб кетаётган эканлар. “Дилдора опа матнларни ўқишингизга ҳавасим келади, студияга сиз билан кирсам бўладими?”, деб сўраганман. Расмий хабарлар ўқиладиган студия қаттиқ назорат қилинади, Дилдора опа кийимларини қўлимга тутиб, “Амаллаймиз”, деган. Кийим баҳона қоровуллар ичкарига киритишган. Дилдора опа эфирга тайёргарлик кўраётганда, ёнимга ёши катта чироқ устаси келиб, кимлигимга қизиққан. Ўзимни таништирганимдан кейин “Сендан диктор чиқмайди. Дилдорани қара, қанақа чиройли сен бўлса... Ёқимтойсан, аммо барибир диктор бўлолмайсан”, деган. Мана шу гап юрагимга қаттиқ ботган, — дейди Нилуфар Сотиболдиева.

Бобур Мансуров: “Эпизодни ўйнашни 8 йил кутганман”

— Ўзбекистон давлат санъат ва маданият институтига ўқишга кирган йилимдан бошлаб, то 8 йилга қадар кастингларда иштирок этганман. Қизиғи, ҳамма курсдошларим кастинглардан ўтишарди. Аммо мен бирор марта эпизодга ҳам қабул қилинмаганман. “Кўринишим ёқмайдими, шунчалик хунукманми?”, деб ўз-ўзимга савол берардим. Ҳатто бир сериалнинг кастингидан барча курсдошларим ўтишган, мен эса ўтолмаганман. Бир томондан курсдошларимнинг ютуғидан қувондим, бошқа томондан эса ичимда ғалати ғалаён бўлган. Шундан кейин рол беришмаса, ўзим режиссёр бўламан деб хусусий телеканалга ишга кирганман. Тўрт ой иккинчи режиссёр вазифасида ишлаб, бир тийин ҳам ҳақ олмаганман. Ижоддан қониқмаслик ва пулсизлик сабаб Россияга ишлашга кетмоқчи ҳам бўлганман, — дейди Бобур Мансуров.

Дилшода Рустамжонова: “Актриса чиройли бўлиши керак, дейишган”

—  Санъатга бўлган қизиқишим сабаб қаерда кастинг бўлаётганини эшитсам, албатта етиб борардим. Чунки мени бу борада қўллаб-қувватлайдиган ишонган инсоним йўқ эди. Аммо истеъдодли бўлганингиз билан сизни қўллаб-қувватлайдиган инсон бўлмаса, жуда қийин. Деярли жуда кўп кастинглардан ўтмаганман. Аммо ҳеч умидимни узмасдим. “Актриса бўлиш учун чиройли бўлиш керак”, деб ташқи кўринишимга эътироз билдирилган пайтлар ҳам кўп бўлган. Ана ўша вақтдаги гаплар кўнглимга жуда оғир ботарди, аммо ўзимни қўлга олиб, кулиб чиқиб кетардим. Муниса Ризаеванинг илк яккахон концертидаги кичик саҳна кўринишида иштирок этганман. Менга умуман ҳақ тўланмаган, аммо жуда хурсанд бўлганман. Бу энг катта муваффақиятим эди, — дейди актриса Дилшода Рустамжонова.

Дилшод Назаров: “Типажингиз унча эмас экан, дейишган”

— Ўзбекистон санъат ва маданият институтига ўқишга киришга кетма-кет уч йил ҳужжат топширганман. Аммо кириш баллини тўплай олмаганман. Актёр бўламан деб жуда кўп кастингларда иштирок этганман. Ҳатто, бир марта рол бермай туриб, “Типажингиз унчамас экан-да”, дейишган. Таксичилик қилиб юрган пайтларимда битта танишим сериал олинаётгани ҳақида айтиб қолган. “Бедор туйғулар” номли сериалда сотувчи йигит ролини ижро этганман. Бу ролда суратга тушишим учун 100 минг сўм берганман. Аммо сериал қайси каналда намойиш этилганини ҳам билмайман, — дейди блогер.

Дилноза Кубаева: “Режиссёр озсанг, фильмга оламан, деган”

— Зулфиқор Мусоқовга “Қачон мени ҳам фильмингизга таклиф этасиз?” деб сўраганимда “Дилноза тўлишиб кетибсан, 10 кг вазн ташласанг рол бор”, деган. Мана шу гапдан кейин озишга жиддий киришдим. Кейин менга “Осмондаги болалар-3” фильмидаги шифокор аёл роли берилди, — дейди Дилноза Кубаева.

Дилшод Мирзамуродов: “Режиссёрлар 10 йил деганда эпизод рол беришган”

 — Ишонасизми, 27 ёшимга қадар кинодаги ролларга тасдиқлашмаган. Режиссёрларга кўринишим, овозим ёки маҳоратим ёқмас эди. Санъат соҳасига кириб келганимга 10 йил бўлганида “Ҳур қиз” фильмида чиптачи ролини ижро этганман. Бу қаҳрамоннинг кўрсатиладиган дақиқаси шунчалик камки, томошабинлар унинг бор-йўқлигини ҳам пайқашмаса керак. Иккинчи ролим эса Жавлон Шодмоновнинг “Замонавий совчилар” фильмида яратилган. Ундаги ролим ҳам жуда кичик эди, аммо ўзимни катта экранда кўриб роса қувонганман, — дейди Дилшод Мирзамуродов.