Шавкат Мирзиёев таклифига биноан Сингапур президенти Ҳалима Яқуб 23–25 май кунлари давлат ташрифи билан Ўзбекистонда бўлади.
Президент матбуот хизматининг хабар қилишича, Сингапур раҳбарининг ташрифи дастурида олий даражадаги музокаралар ўтказилиши кўзда тутилган.
Саммит кун тартибидан конструктив сиёсий мулоқотни янада ривожлантириш, минтақавий ва халқаро ташкилотлар доирасида ўзаро қўллаб-қувватлаш, икки мамлакат етакчи компания ва банк институтлари иштирокидаги инвестиция лойиҳаларига кўмаклашиш, маданий-гуманитар алмашинувни кенгайтириш масалалари ўрин олган.
Президент Ҳалима Яқуб Олий Мажлис Сенати раиси, диний конфессиялар раҳбарлари билан ҳам учрашади, ишбилармон доиралар бизнес-форумининг очилишида ва қўшма таълим маркази фаолиятининг тақдимотида иштирок этади.
Бундан ташқари, у Самарқанд шаҳрига ташриф буюриб, Буюк Ипак йўли чорраҳасида жойлашган ушбу кўҳна марказнинг бой маданий-тарихий ва цивилизациявий мероси билан танишади.
Таъкидланишича, Ҳалима Яқуб Ўзбекистонга жавоб ташрифи билан келмоқда. 2023 йилнинг январь ойида Ўзбекистон етакчиси Сингапурга давлат ташрифи билан борган эди.
Изоҳ (0)