Ўзбекистонда январь—апрель ойларида электромобиллар импорти 3,5 баробарга ошди

Ўзбекистонга январь—апрель ойлари давомида 2 544 дона электромобиль импорт қилинган. Бу ҳақда Статистика агентлиги хабар берди.

Қайд этилишича, Ўзбекистон 2023 йилнинг тўрт ойида 9 та хорижий давлатдан қиймати 81,3 миллион долларга тенг бўлган 2 544 дона электромобиль импорт қилган. Электромобиллар импорти ўтган йилнинг мос даври билан солиштирилганда 1815 тага (3,5 баробарга) ошган.

Ўзбекистон 2023 йилнинг апрель ойида хорижий давлатлардан 876 дона электромобиль импорт қилган.

Энг кўп электромобиль импорт қилган давлатлар:

• Хитой — 2 278 та;
• Гонконг — 202 та;
• Германия — 32 та;
• БАА — 16 та;
• Жанубий Корея — 9 та;
• АҚШ — 4 та.

Автомобиллар импорти

Ўзбекистонга 2023 йилнинг январь—март ойларида 1 668 та электромобиль импорт қилинган. Шунингдек, март ойида хорижда ишлаб чиқарилган янги енгил автомобиллар савдоси сезиларли даражада ошгани тўғрисида хабар берилганди. Бир ой ичида “иномарка”лар бўйича битимлар сони 15 фоизга кўпайган ва 2,9 минг донага етган. Февраль ойида эса электромобиллар сотуви 746 донани ташкил этиб, рекорд қайд этган эди.