Қашқадарё вилоятининг Шаҳрисабз шаҳрида фаолият юритувчи адвокат ва юрист консултант таъмагирликка йўл қўйди. Адвокат 1,5 минг долларга ҳокимиятдаги алоқаси орқали ноқонуний эгаллаб олинган ер майдонини фермер хўжалиги ҳисобига қайтаришда ёрдам бериш эвазига, Шаҳрисабз шаҳар юридик хизмат кўрсатиш маркази бош юристконсулти (собиқ прокуратура ходими) 180 миллион сўмлик камомадни ёпиб бериши эвазига 3 минг доллар талаб қилди. Адвокат ва юристнинг бу қилмиши ДХХнинг вилоят бошқармаси ва ҳамкор ташкилотлар ўтказган тезкор тадбирда фош бўлди.
Маълум бўлишича, вилоятнинг Яккабоғ туманида яшовчи фуқаро ДХХнинг вилоят бошқармаси бошлиғига мурожаат қилиб, шаҳрисабзлик адвокат фермер хўжалигига тегишли бўлган, аммо фуқаролар томонидан ўзбошимчалик билан эгаллаб олинган 35 сотих ер майдонини туман ҳокимлигидан судга даъво ариза киритиб, олиб беришини ваъда қилаётганини билдирган.
Мурожаатчининг қўшимча қилишича, адвокат бу қилмиши учун ҳокимликдаги танишларига пул беришини айтиб, 1,5 минг доллар сўраган.
ДХХнинг вилоят бошқармасига яна бир мурожаат келиб тушган бўлиб, унда Шаҳрисабз шаҳар юридик марказ бош консулти Шаҳрисабз туман собиқ Маҳалла ва нуронийларни қўллаб-қувватлаш бўлимида шаҳар прокуратураси терговчиси томонидан аниқланган 180 миллион сўмлик камомадни ёпиб беришини айтиб, 3 минг доллар сўраётгани маълум қилинган.
ДХХ вилоят бошқармаси ҳамда ҳамкор ташкилотлар томонидан ўтказилган тезкор тадбирда ҳар икки ҳолат ҳам аниқланиб, адвокат ва юридик марказ бош консултантга нисбатан жиноят иши қўзғатилган. Айни пайтда тергов-суриштирув жараёнлари олиб борилмоқда.
Изоҳ (0)