Самарқанд шаҳридаги кўзи ожизлар мактаби ўқувчиси автобус уриб юбориши оқибатида вафот этди. Бу ҳақда “Дарё” манбаси хабар берди.
Самарқанд вилоят ИИБ ахборот хизмати мазкур хабарни тасдиқлади.
Мазкур хабарни тасдиқланган яна бир манба Самарқанд шаҳридаги 59-сонли кўзи ожизлар мактабининг исми сир қолишини сўраган ўқитувчиси марҳум ўқувчи 11-синф бўлганини маълум қилди.
“Ҳозирда ‘Нурли маскан’ деб номланадиган мактабимизнинг 11-синф ўқувчиси 13 май куни 12:50 да бешинчи соат дарсини тамомлаб, шериги билан кўчага чиқиб кетган. ЙТҲ соат 14:00 атрофида содир бўлган”, — дейди ушбу мактаб ўқитувчиси.
Маълумотларга кўра, марҳум ўқувчи Давлат Қурбонов ва унинг шериги дўконга бориб-келиш баҳонасида назорати суст мактаб биносидан осонгина чиқиб кетган.
“Ўқувчилар дўконга кирмасдан шаҳардаги истироҳат боғига кетиб қолган. Трамвайдан тушиб йўлнинг иккинчи томонига ўтаётганда ўқувчилардан бирини автобус уриб юборган. Автоҳалокатга учраган бола шифохонага етказилган. Бироқ 15 май куни кўрсатилган ёрдамларга қарамасдан вафот этган”, — дейди манба.
Қўшимча қилинишича, мазкур мактаб махсус режимдаги мактаб бўлганлиги учун ўқувчилар фақатгина раҳбариятнинг рухсати билан ташқарига чиқиши мумкин.
“Марҳум ўқувчи асли сурхондарёлик бўлиб, 7 ёшидан бери шу ерда ўқиб, яшаб келган. Ота-онаси ҳар чорак ёки байрамларда олиб кетган. Бундай ҳодисага ишчиларини тартибга сололмай лоқайдлик қилган раҳбар айбдор. Мактаб ёпиқ типдаги мактаб ҳисобланади. Бундай мактабларга қўриқлаш хизматидан ходим қўйилиши керак. Ҳозирги қоровуллар пенсия ёшида”, — дейди биз билан суҳбатда бўлган мактаб ўқитувчиларидан бири.
Изоҳ (0)