Навоийда лўли қизлар йигитнинг қўлини тишлаб, пулини олиб қочди

Навоий шаҳрида 8 май куни икки нафар лўли қиз йўловчи йигитнинг қўлини тишлаб, пулини олиб қочди. Тергов департаменти ҳолат юзасидан маълумот берди.

Қайд этилишича, икки қиз истироҳат боғида юрган 27 ёшли йигитнинг ёнига келиб, тиланчилик қилиб пул сўраган. Йигит минг сўм пул бераётганда қизлардан бири унинг қўлини тишлаган.

Улар йигитга ҳаёт ёки соғлиқ учун хавфли бўлмаган зўрлик ишлатиб, шимининг чўнтагида бўлган 300 минг сўм пулни ва 200 минг сўмлик кумуш занжирни тортиб олиб, ҳодиса жойидан қочиб яширинган.

Олиб борилган тергов-тезкор ҳаракатлар натижасида мазкур жиноятни 16 ёшли вояга етмаган К.С. ва 13 ёшли Б.Г. бир гуруҳ бўлиб содир этгани аниқланиб, улардан жабрланувчига тегишли бўлган 300 минг сўм пул ва кумуш занжир ашёвий далил тариқасида расмийлаштириб олинган.

Мазкур ҳолат юзасидан вояга етмаган К.С. ва Б.Г.га нисбатан Жиноят кодексининг 166-моддаси 2-қисми “а,в” бандлари (товламачилик) билан жиноят иши қўзғатилган. Ҳозирда тергов ҳаракатлари олиб борилмоқда.