Тошкент вилоятидаги мавжуд цемент, ғишт заводлари ҳамда иссиқхоналар 2023 йил якунига қадар тўлиқ кўмир билан иситиш тизимига ўтказилади. Бу ҳақда Халқ депутатлари Тошкент вилояти кенгашининг навбатдаги 74-сессиясида сўз борган.
.jpg)
“Сессияда давлат раҳбарининг 2023 йил 16 февралдаги 2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисидаги қарорининг Тошкент вилоятидаги ижроси бўйича қилинаётган ишлар муҳокама қилинди. Республика ва вилоят ишчи гуруҳлари томонидан электр энергия ва табиий газнинг вилоят ҳудудига киришидан бошлаб, охирги истеъмолчининг нуқталаригача бўлган ҳар бир тармоқ, трансформатор, газ тақсимлаш пунктларининг бугунги кундаги истеъмол ҳолати ўрганилди”, — дейди вилоят ҳокимлиги ахборот хизмати раҳбари Беҳзод Қобулов.
Таъкидланишича, Тошкент вилоятдаги мавжуд 1120 та ижтимоий соҳа объектни давлат-хусусий шериклик асосида кўмир ёқилғисига ўтказиш учун вилоят 100 минг тонна кўмир маҳсулоти харид қилиши лозим бўлади.
“Шунингдек, 61 та иссиқхона тўлиқ кўмирга ўтказилади. Натижада, 32,1 миллион куб/метр табиий газ ёки 32,1 миллиард сўм маблағ иқтисод қилинади”, — дейди масъул.
Бундан ташқари, сессияда аҳоли истеъмолчиларини қуёш панеллари ва гелиоколлекторлар билан таъминлаш орқали миллионлаб энергия тежалишига эришилиши таъкидланган.
“Юқоридаги масалалар юзасидан депутатларнинг мулоҳазалари тингланиб, ҳудудлардаги кўча ёритиш чироқларини ҳам 100 фоиз қуёш панелларида ишловчи ёритиш қурилмаларига алмаштириш таклифи илгари сурилди ва маъқулланди”, — дейди Беҳзод Қобулов.
Аввалроқ Шавкат Мирзиёев 11 май куни бўлиб ўтган йиғилишда ҳудудларда энергияни тежаш масаласига тўхталиб ўтгани, кўмирга талаб шу йилнинг ўзида 1,5 бараварга ошиши кутилаётганини ҳисобга олиб, жорий йилда кўмир қазиб чиқаришни 5,3 миллион тоннадан 6,5 миллион тоннага олиб чиқиш зарурлигини қайд этгани хабар қилинганди.
Изоҳ (0)