Қирғизистонда Омбудсман институти экспертлари қамоқхонадаги аёллардан болаларни олиб қўйишни тақиқловчи қатор қонунларга ўзгартиришлар киритишни таклиф қилди.
Шунингдек, қамоқдаги ҳомиладор аёллар ва ёш боласи бор қизлар учун мақбул моддий-маиший шароитлар таъминлаш илгари сурилган.
Ҳуқуқ ҳимоячилари Қирғизистон жазони ижро этиш муассасаларида аёллар ҳуқуқларининг бузилишини бир неча бор қайд этган. Кўпинча шахсий тинтув қарама-қарши жинс вакиллари томонидан амалга оширилади, бу қонун нуқтаи назаридан қабул қилиниши мумкин эмас.
Бундан ташқари, маҳкум аёллар шахсий гигиена воситаларидан фойдаланиш имконига эга эмас. Тиббий кўрикдан ўтиш ва тиббий хизмат кўрсатилишидан бош тортиш ҳолатлари ҳам тез-тез қайд этилган.
Таъкидланишича, ҳибсга олинганлар ўзларининг камситилишини ва қадр-қимматига тажовузни ҳис қилмасликлари учун штатларни кенгайтириш ва аёлларни ахлоқ тузатиш муассасаларига ишлашга жалб қилиш зарур.
Изоҳ (0)