“Билетлар қўлга чиқиб кетади”. Вилоятларга қатновчи поездлар чипталарини яширин сотиш ҳолатлари кўплиги айтилмоқда

Facebook тармоғида Самарқанд, Бухоро, Хоразм ва бошқа вилоятларга қатновчи поездларга чипта топиш мураккаб экани муҳокамаларга сабаб бўлмоқда. Айрим тармоқ фойдаланувчилари чипталар қўлга чиқиб кетаётгани сабаб навбатлар кўплиги ҳақида ёзмоқда.

Facebook фойдаланувчилари Ўзбекистон темирйўл кассаларидан чипта сотиб олишда муаммолар юзага келаётгани, рейслар сони камлиги ва поездларнинг оралиқ интервали узунлигидан норозилик билдирмоқда. Фаолларнинг сўзларига кўра, кўпчилик ўзи истаган вақтга поездларга чипта топа олмайди. Доим чипта тамом бўлгани ёки етишмаслиги муаммоси бўлади.

Тадбиркор Анвар Нарзуллоҳнинг ёзишича, у Самарқандга қатновчи поездга май ойи охиригача бўлган вақтда чипта топа олмаган.

Ўзбекистонга келганимдан бери неча марта Самарқандга борган бўлсам, бирор марта “Афросиёб”га билет ололмадим. Бир марта ICТ week учун ташкилотчилар тайёр билет беришди. Яқинда Индонезиядан меҳмонлар келади. 20—28 май оралиғи учун билет қидиряпман, аллақачон тугаган. Авиачипталар ҳам шу аҳвол, ёки йўқ, ёки отнинг калласидек қиммат. Шунча талаб бор экан, тиқиб ташла поездларни. Ҳар соат биттадан рейс қўй, пулни қил. Йўқ, халқнинг дарди ҳаммага бир тийин, эпласа, ана кирада кецин. Яқинда бир танишдан сўрасам, ҳар бир вазирлик хизмат сафарлари учун доимий 5-10 та билетни банд қилиб ўтиради, дейди. Нечта вазирлик бор? Ҳар бири 5 тадан жойни банд қилганда ҳам анчагина билет сотувдан олинган. Яна ички туризм деганига ўлайми, — дея пост қолдирган тадбиркор.

“Афросиёб”га охирги марта 2020 йил, карантин авжига чиққан вақт чиққан эдим. Яқин 2-3 йилда бунақа “катталарники” майли, ҳатто оддий поездни пласткартига ҳам чиқолмай қолдик, доим билет йўқ. Ҳайитдан бир ҳафтача олдин синов учун Транспорт вазирлигига мурожаат юбордим. 2-3 ҳафтада қўнғироқ қилди. Энди “тўй ўтиб бўлди-ку...” маъносида гапирсам, ҳа, ака ўтиб бўлди, хоҳласангиз вазирлик қилаётган ишлар ҳақида гапириб бераман, дейди. Бўлди, фойдаси йўқ-ку, сафсатага вақт сарфламай қўяверайлик, дедим, — деб ёзади Қодиржон Bumатов.

Мазкур масалага билдирилган муносабатларда айрим тармоқ фойдаланувчилари чипталар қўлга чиқиб кетишига тўхталган.

“Билетлар қўлга чиқиб кетади. Кассирга бориб, устини берсангиз, дарров топиб беради. Фамилия-исм ёзмайди. Брон қилиб, олдириб қўяди. Бегона сўраса, билет йўқ. Таниш-билишларга устини олиб беради. Яқинда ишим тушиб билдим. Тўртта билет олиб берди танишим”, — дея фикр билдирган фойдаланувчилардан бири.

“Билет доим бўлади. Фақат қўлига пул беришингиз керак. 2 дақиқада хоҳлаган жойингиздан чиқади шунда. Бўлмаса, кассадагилар йўқ деб ўтираверишади. Лекин буни ҳамма ҳам билмайди-да”, — дея қўшимча қилган Bella Донна номли аккаунт эгаси.

Сардор Душамовнинг ёзишича, Хоразм вилоятига қатновчи поездлар учун чиптага навбат катта, аммо чипталар сотувда йўқ.

“Бу темирйўл кассалари. Бу инсонларнинг 80 фоизи Хоразмга кетмоқчи. Лекин билет йўқ. Бугун 3 та поезд Хоразмга кетади, лекин жой йўқ, доимгидек. Вагон қўшилади дейишгани учун ҳамма кутяпти. Мен ҳам кутяпман. Айтадиган гапим кўп, айтмай қўявераман, барибир ҳал бўлмайди”, — деб ёзади у.

“Мен ҳам онамни Бухорога саёҳатга олиб бораман деб поездга билет тополмадим. Нафақат ‘Афросиёб’, балки Бухородан ўтадиган поездларга ҳам билет йўқ эди. Поездлар қатнови кам, интервали узоқ, билет сотиш — ўйин”, — деб ёзган яна бир фойдаланувчи.

“Мен Андижонданман. Самарқандда яшайман. Худди шундай ҳолат бизда ҳам бўлади. Агар Андижондан меҳмонлар келадиган бўлса, 1 ой аввал билет олиш керак ёки 2–3 кунлаб сарсон бўлиб кутишга тўғри келади. Аслида шу темирйўлларни тадбиркорларга хусусийлаштириб бериш керак. Кейин поездлар кўпайиб қолар”, — дея фикр билдирган Facebook фойдаланувчиси Миркомил Тошматов.