“Ўзбекистондан ташқарида юз берган”. Йигит аёвсиз дўппослангани акс этган видео бўйича маълумот берилди

Ички ишлар вазирлиги ижтимоий тармоқларда тарқалган бир эркакнинг ёш йигитни дўппослагани тасвирланган видеога муносабат билдирди.

Маълум қилинишича, ижтимоий тармоқларда номаълум кимса бошқа шахсни дўппослаб, унга тан жароҳатлари етказаётганлиги тасвирланган видеолавҳа Ўзбекистон ИИВ Тезкор-қидирув департаменти томонидан ўрганилмоқда. Мазкур ҳолат республика ҳудудидан ташқарида содир этилгани бўйича бирламчи тезкор маълумот олинган.

“Ҳозирда департамент ходимлари томонидан хорижий ҳамкасблар билан ҳамкорликда видеолавҳада акс этган фуқароларнинг шахсига аниқлик киритиш бўйича тезкор-қидирув тадбирлари амалга оширилаётган бўлиб, уларнинг натижаси юзасидан айбдорларга нисбатан жазо муқаррарлигини таъминлаш чоралари кўрилади”, — дейилади муносабатда.

Апрель охирларида Ўзбекистонда наркозакладчикларни жазолаш билан шуғулланиб келган 20 киши қўлга олингани тўғрисида хабар берилганди. Шунингдек, Наманганда 21 ёшли йигит ўзидан кичик болалар томонидан “самосуд” қилингани, Россияда танишининг қулоғини кесиб ташлаган ўзбекистонлик эркакка ҳукм ўқилгани, Бухородаги тунги клубда эркак 2 кишини калтаклагани маълум бўлган эди.