Америкалик фуқаро ёввойи оққушни қутқарди, қуш ўз қутқарувчисига миннатдорлик билдириб, унинг бўйнидан қучоқлаб олди. Воқеа бундан бир неча йил олдин содир бўлган, бироқ яқинда бу ҳақдаги маълумотлар ижтимоий тармоқларда тарқалди.
Бир неча йил аввал америкалик тадқиқотчи ва Born to Explore телекўрсатуви бошловчиси Ричард Визе Буюк Британиядаги Эбботсбери Суонерри оққушлар питомнигига борган. Эбботсбери Суонерри дунёдаги ягона қаров остидаги соқов оққушлар колонияси ҳисобланади.
Ричард Визе ва қушларни ҳимоя қилиш ташкилотлари вакиллари оққушларга реабилитация даврида ёрдам беришга борган. Ташриф чоғида бошловчи панжара билан тўқнашув натижасида яраланган ўзгача оққушга дуч келган. Ричард уни бошқа жойга олиб бориш учун эҳтиёткорлик билан ушлаган.
Кейинроқ содир бўлган воқеа атрофдаги барчада унутилмас таассурот қолдирди. “Оққушни қўлимга олганимда, унинг юраги қандай ураётганини ҳис қилдим. Бироқ у дарров бўшашиб, бўйни билан бўйнимни ўраб олди. Жонзот сизга тўлиқ ишонганини сезиш жуда ажойиб ҳодиса. Мен кўзларимни юмиб, ҳамма нарсадан бир лаҳзага йўқолиб қолишни истардим”, — дейди кўрсатув бошловчиси.
Ушбу таъсирли лаҳза инсон ва ҳайвонлар муносабатининг энг ёрқин мисолларидан бирига айланди. Бундан ташқари, оққушларнинг ғамхўр, шу билан бирга, тажовузкор қушлар деб ҳисобланиши ҳам ҳайратланарли. Бироқ бу оққуш ҳеч қандай тажовузкор ҳаракат кўрсатмади.
Ўз навбатида, инсоннинг ғамхўрлиги, меҳр-оқибати ҳайвонларни қутқариши ва ҳимоя қилиши мумкин.
Изоҳ (0)