АҚШ Федерал депозитларни суғурталаш корпорацияси (FDIC) муаммоли First Republic банкини бугун, 1 май куни Калифорния молиявий ҳимоя ва инновациялар департаменти томонидан ёпилганини ва FDIC томонидан ташқи бошқарувга берилганини эълон қилди.
First Republic банки билан боғлиқ муаммолар ҳақидаги миш-мишлар 10 март куни Silicon Valley Bank банкротлиги ҳақидаги хабар билан бирга пайдо бўлганди.
Кейинчалик вазиятга АҚШ ҳукумати аралашди ва банк Федерал захира тизими (Фед) ва Америкадаги 6 та йирик банкдан 30 млрд доллар ёрдам олди.
Шунга қарамай, биринчи чоракда First Republic банкидан мижозлар маблағларининг чиқиб кетиши 100 млрд доллардан ортиқни ташкил этди ва йил бошидан буён банк акциялари 97 фоизга арзонлашди.
28 апрель куни FDIC JPMorgan ва бошқа баъзи банклар ва инвестиция компанияларидан муаммоли банкни сотиб олишни сўраганди. JPMorgan Chase First Republic банкини сотиб олишга рози бўлди.
2023 йил 13 апрель ҳолатига кўра, First Republic банкининг жами активлари тахминан 229,1 млрд долларни ва жами депозитлари 103,9 млрд долларни ташкил этган. Банкнинг банкротлиги — АҚШ тарихидаги энг йирик иккинчи банк инқирози дегани.
Изоҳ (0)