Европа Иттифоқи ва G7 мамлакатлари гибрид трибунал Россия раҳбарияти ва Украинага қарши жиноятларнинг бошқа айбдорларини жавобгарликка тортишнинг энг реал истиқболи бўлади, деб ҳисоблайди. Бу ҳақда Евроиттифоқнинг юқори мартабали амалдорига таяниб, Deutsche Welle хабар берди.
Унга кўра, одил судловни амалга оширишнинг энг эҳтимолий варианти Украина юрисдикцияси остидаги халқаро трибунал бўлади.
“Трибунал сиёсий императивга хизмат қилади, яъни жавобгарликка тортишни назарда тутади”, — деди расмий.
Унинг қўшимча қилишича, Украина Рим статутини ратификация қилиши Европа Иттифоқи учун жуда муҳим.
Россияни жавобгарликка тортиш учун трибунал: Нималар маълум?
2022 йил охирида Еврокомиссия Россиянинг Украинага қарши босқинчилик жиноятини таъқиб қилиш учун махсус суд яратишни таклиф қилди. Иккита вариант кўриб чиқилди:
- кўп томонлама шартномага асосланган махсус мустақил халқаро трибунал;
- Украина каби маълум бир давлатнинг юрисдикциясини ва турли мамлакатлар судьялари билан халқаро ҳуқуққа асосланган жараённи бирлаштирадиган “гибрид суд”.
Еврокомиссия иккала вариантни амалга ошириш БМТ томонидан кучли қўллаб-қувватлашни талаб қилишини билдирди. Россия БМТ Хавфсизлик Кенгашида резолюция қабул қилишига тўсқинлик қилиши сабабли БМТ Бош Ассамблеяси уни тасдиқлаши мумкин.
Maxсус суднинг прокурори ўз қарори асосида олий раҳбариятни суверен давлат дахлсизлигидан маҳрум қилиш тўғрисида ҳукм чиқариши мумкин.
“Прокуратура жуда жиддий ишни тақдим этиши керак”, — дея Брюсселдаги амалдор Гаагада Украинага қарши босқинчилик жиноятини тергов қилиш халқаро марказини очиш муҳимлигини таъкидлади.
Ҳозирда Европа Иттифоқи кенгашига раислик қилаётган Швецияга кўра, бундай марказ июнь ойи охирида иш бошлаши керак.
Изоҳ (0)