Профессионал бокснинг супер ўрта вазн (-76,2 кг) тоифаси вакили Бектемир Мелиқўзиев (12-1, 9 КО) Ўзбекистон вақти билан 23 апрель тонгида ўзининг навбатдаги жангини ўтказди.
АҚШнинг Лас-Вегас шаҳрида бўлиб ўтган бокс оқшомида ўзбекистонлик боксчига Габриэль Росадо (26-17-1, 15 КО) рақиб бўлди. Жанг тўлиқ 10 раунд давом этди. Дастлабки икки раунд ўртача темпда ўтди ва кичик устунлик Мелиқўзиев томонидан бўлди. Учинчи раундга келиб Бектемир фаолликни оширди ва рақибига сезиларли зарбаларни ўтказа олди.
Бешинчи раундда Мелиқўзиев чап қўл зарбасидан кейин рақибини мувозанатдан чиқаришга эришди. Кейинги уч раунд ҳам Ўзбекистон вакилининг яққол устунлигида ўтди. Тўққизинчи раундда Бектемир зарбалар серияси орқали Росадога кучли босим ўтказди. Ўнинчи раундда ҳам Мелиқўзиев рақибига имкон қолдирмади. Якунда ҳакамлар бир овоздан ўзбекистонлик боксчининг ғалабасини қайд этди — 99-91, 99-91, 99-91.
Шу тариқа Бектемир Росадога қарши кечган иккинчи жангни ғалаба билан якунланди. Мелиқўзиев 2021 йил 19 июнида ҳам Росадога қарши рингга чиқиб, беллашувнинг 3-раундида аянчли нокаутни қабул қилиб олганди.
Ўша жангдан кейин Росадо 3 бор рингга чиқиб, барчасида (Мунгиа, Шейн Мосли Жуниор ва Али Аҳмедовга) очколар эвазига мағлуб бўлди. Мелиқўзиев эса 4 та жангда ғалаба қозонганди: Сергей Екимов, Девид Зегарра, Сладан Жанжанин ва Улисес Сиерра мағлуб этилган.
Изоҳ (0)