Қирғизистон президенти Садир Жапаров кириллча ёзувга асосланган қирғиз тилини лотин алифбосига ўтказиш бўйича ўз фикрини билдирди. Бу ҳақда AKIpress хабар берди.
Жапаров Давлат тили бўйича миллий комиссия раиси Қанибек Осмоналиевга кескин баёнот бериб, уларни тил сиёсати, хусусан, қирғиз тилини лотин тилига ўтказиш борасидаги бепарво гаплардан сақланишга чақирди.
“Қирғиз тилининг лотин алифбосига ўтиши ҳақида гапиришга ҳали эрта. Кирилл алифбосида давлат тилини тўғри, малакали билиш даражасини таъминламасдан туриб, лотин алифбосига ўтиш ҳақида гап бўлиши мумкин эмас. Ҳозир бу савол кун тартибида эмас, давлат тилини ривожлантириш кирилл алифбосида давом этиши керак”, — деди Жапаров.
19 апрель куни Жогорку Кенеш “Давлат тили тўғрисида”ги конститусиявий қонун лойиҳасини иккинчи ўқишда қабул қилди. Муҳокама чоғида депутат Эмил Токтошев алифбони лотин алифбосига ўтказиш зарурлиги ҳақида Осмоналиевнинг фикрини сўради.
“Агар Жогорку Кенеш ва президент сиёсий қарор қабул қилса, зиёлилар ва олимлар лотин алифбосига ўтишга тайёр”, — деб жавоб берганди у.
Қирғизистонда рус тили расмий тил мақомига эга. Мамлакат ҳудудида кирилл алифбосига асосланган ёзув қўлланади.
Эслатиб ўтамиз, ХIX асрнинг биринчи ярмида қирғизлар араб ёзувидан фойдаланган. 1911 йилда биринчи қирғиз босма нашрлари пайдо бўлган.
1927 йил 12 декабрда Қирғизистон АССР (автоном совет социалистик республикаси) Марказий ижроия қўмитаси лотинлаштирилган алифбони давлат алифбоси деб тан олди. Кейинчалик, 1940 йилда Қирғизистон ССР Олий совети кирилл алифбосига ўтишни маъқуллади.
Изоҳ (0)