Қашқадарё вилоятининг Косон туманида яшовчи 14 ёшли қиз отаси томонидан аёвсиз калтакланди. Бу ҳақда “Дарё” манбаси хабар берди ҳамда воқеа тасвирланган видеони таҳририятга тақдим қилди.
“Дарё”нинг бу ҳақдаги дастлабки сўровига жавоб берган Косон тумани ҳокими ўринбосари, оила ва хотин-қизлар бўлими бошлиғи Нодира Қодирова Ўзбекистонда хотин-қизлар ҳуқуқларини ҳимоя қилиш, уларга нисбатан бўлаётган зўравонликларни тўхтатиш мақсадида янги қонун қабул қилинган пайтда содир бўлган айни воқеа ҳуқуқни муҳофаза қилувчи органлар томонидан назоратга олинганини маълум қилди.
Вилоят ИИБ ахборот хизмати эса воқеа қачон содир бўлганига аниқлик киритди.
“Жорий йилнинг 16 апрель куни тахминан соат 11:30 ларда Косон тумани ‘Қорабайир’ маҳалласида яшовчи 2009 йилда туғилган Х.Г. онаси 1982 йилда туғилган М.М. ҳамда отаси 1978 йилда туғилган Т.Р. томонидан калтакланган. Мазкур ҳолат вояга етмаган қизнинг амакиси томонидан видеотасвирга олиниб, Ички ишлар органларига хабар берилган. Ҳозирда воқеа иштирокчиларининг барчаси аниқланиб, терговга қадар текширув ишлари олиб борилмоқда. Вояга етмаган қизнинг отаси руҳий касалликлар диспансерига текшириш учун юборилган. Жабрланувчи Х.Г.га нисбатан етказилган тан жароҳатларини аниқлаш учун суд-тиббий экспертизаси тайинланган”, — дейилади расмийлар маълумотида.
Косон тумани ҳокимлигининг маълумот беришича, ўша куни воқеадан маҳалла ходимлари, туман ҳокимлиги, оила ва хотин-қизлар бўлими хабар топиб, туман ички ишлар органларига отанинг ҳаракати бўйича хабар берилган.
“Ўша куниёқ экспертиза тайинланиб, ҳозирги кунда хулосалари кўриб чиқилмоқда”, — дейди ҳокимлик ахборот хизмати раҳбари Дилшод Набиев.
Ҳокимликнинг аниқлаштиришича, калтакланган қиз отанинг бошқа турмушидан туғилган фарзанди бўлиб, видеодаги она унинг ўгай онаси бўлган.
“Оила ва хотин-қизлар бўлими томонидан туман ҳокимлиги болаларни ҳимоя қилиш шўбаси маъсуллари жалб қилиниб, боланинг ҳуқуқини ҳар томонлама қўллаб-қувватлаш борасида тегишли кўрсатмалар берилган. Шунингдек, ота-она билан ҳам алоҳида суҳбат ўтказилиб, тушунтириш ишлари олиб борилди. Ҳозирги кунда қиз маҳалла қарамоғига олинган ҳамда унинг хавфсизлиги таъминланган. Бугунги кунда боланинг ва отанинг розилиги асосида унинг васийликка берилиш масаласи кўриб чиқилмоқда”, — дейилади ҳокимлик ахборотида.
Изоҳ (4)
бу ота билан онани қўшиб осиш керак
Qizda qanaqadur ayb boʼlganmi yuqmi
Har qanaqa holatdayam ota farzandini,ayniqsa qiz farzandini shu darajada xo'rlashi mumkinmi.Bu yerda hamma gap uni onasida menimcha.Onasi o'gay ekan
Bu hayvonlarga nima deb ta'rif berishgayam tilim lol.Qanaqa qilib o'z farzandini bunaqa xo'rlash mumkin