Самарқандда бўлиб ўтган Афғонистонга қўшни мамлакатлар вакиллари йиғилишда Покистон делегациясига раҳбарлик қилган Покистон ташқи ишлар давлат вазири Ҳина Раббоний Каҳар Афғонистон “жиддий гуманитар ва иқтисодий инқироз” хавфига дуч келаётганини айтди.

Каҳар “Толибон” сиёсати Афғонистондаги инқирозли вазиятни юмшатиш ва мамлакатни халқаро изоляциядан чиқаришда ёрдам бермаётганини таъкидлади. Унинг сўзларига кўра, ҳукуматнинг нотўғри қарорлари Афғонистоннинг дунё давлатлари билан муносабатларидаги муаммоларни ҳал қилишига тўсқинлик қилмоқда.

У, шунингдек, келаси йилда Афғонистонга халқаро ёрдамнинг қисқариши аломатлари борлигидан хавотир билдирди ҳамда дунё давлатларидан Афғонистон ва “Толибон”га нисбатан ёндашувларини “қайта кўриб чиқишни” сўради.

Покистон ТИВ раҳбари “Толибон”нинг афғонистонлик аёлларга БМТ идораларида ишлашни тақиқлаш ҳақидаги сўнгги қарорларидан бирини “номақбул” деб атади ва Ғарб давлатларини “Толибон” ҳаракати туфайли Афғонистонни “унутиб юбормасликка” чақирди. Афғонистонда аёлларнинг ишлаши ва таълим олишига тақиқлар “Толибон” ва бошқа давлатлар ўртасидаги муносабатларда асосий муаммолардан бири бўлмоқда, дея қайд этди амалдор.

Каҳар “Толибон” ва дунё мамлакатлари муносабатлардаги муаммолар Афғонистондаги гуманитар ва иқтисодий инқирозни янада кучайтираётганини қўшимча қилди. Унинг огоҳлантиришича, яқин келажакда бу ҳолат афғонларнинг қўшни давлатларга миграциясини кучайтиради.

Покистон “Толибон” билан яқин ва стратегик муносабатларга эга бўлса-да, Самарқанддаги учрашувда Ҳана Раббоний Каҳар Покистон ва бошқа қўшни давлатларга Афғонистондан “терроризм таҳдиди” бўлаётганини таъкидлади.

Аввалроқ Покистон мудофаа вазири Хаваж Осиф “Толибон” ҳукуматини агар улар Покистонга қарши жангарилар фаолиятини жиловлай олмаса, Афғонистон ичидаги террорчилар бошпаналарига зарба бериши ҳақида огоҳлантирган эди. “Толибон” ҳукумати вазирнинг баёнотларига ҳали жавоб қайтаргани йўқ.