Термиз ҳайвонот боғида 12 апрель куни иккита ноёб ҳайвондан насл олинди. Бу ҳақда вилоят ҳокимлиги ахборот хизмати хабар берди.
Хабарга кўра, Термиз ҳайвонот боғида парвариш қилиб келинаётган Африка ёлдор қўйи 9 апрель куни болалади. Асли келиб чиқиши шимоли-шарқий Африка бўлган ёлдор қўй жуфт туёқлилар туркумига мансуб бўлиб, ҳомиладорлик даври 150-160 кунни ташкил этади ва 1-2 тагача болалайди. Умр кўриш давомийлиги 12-17 йилни ташкил этади.
Таъкидланишича, ушбу ёлдор қўйлар оила бўлиб яшайди. Ўт-ўланлар, ўсимликлар билан озиқланади.
Шунингдек, яна бир ноёб ҳайвон, Ўзбекистон Қизил китобига киритилган Бухоро тоғ қўйи ҳам болалаган. Ушбу ноёб тур ҳисобланган Бухоро қўйи Ўзбекистон, Тожикистон, Туркманистон даштларида учрайди, ўтхўр ҳайвон ҳисобланади. Ҳомиладорлик даври 165 кунни, умр кўриш давомийлиги 12-15 йил яшайди.
Қайд этилишича, ушбу ҳайвонлар тутқунликда кўпайиши қийин бўлган жониворлар турига киради.
Аввалроқ Қашқадарё вилоятининг Чироқчи туманидаги қишлоқда пайдо бўлган Қизил китобга киритилган айиқ отиб ўлдирилгани ҳақида хабар берилган эди. Кейинчалик унинг отиб ўлдирилгани юзасидан жиноят иши қўзғатилди.
Изоҳ (0)