Ўзбекистон футбол ассоциацияси Апелляция қўмитасининг йиғилиши бўлиб ўтди.
Унда кун тартибидан ўрин олган масалалар, хусусан, Тартиб-интизом қўмитасининг 2023 йил 28 мартдаги қарори ҳамда Ҳакамлар қўмитасининг 2023 йил 23 мартдаги қарори устидан “Андижон” футбол клубининг ёзган апелляция шикояти кўриб чиқилди.
2023 йил 11 март куни Суперлиганинг 2-тур доирасида “Сурхон” ва “Андижон” футбол клублари ўртасида бўлиб ўтган учрашувда “Андижон” футболчиси Рубин Ҳебайнинг учрашув бош ҳакамини чет тилида ҳақорат қилганлиги оқибатида бош ҳакам томонидан қизил карточка кўрсатилган вазият ва видеоёзувлар мутахассислар томонидан қайта ўрганиб чиқилиб, футболчига нисбатан тайинланган интизом жазо чорасини енгиллаштириш учун асослар мавжудлиги тўғрисида фикр берилди.
Апелляция қўмитаси Ўзбекистон футбол ассоциациясининг Тартиб-интизом қўмитаси томонидан ишга оид тақдим этилган ҳужжатлар билан танишиб чиқиб, “Андижон” футбол клуби футболчиси Рубин Ҳебайга нисбатан қўлланилган интизомий жазо чорасини қисман ўзгартириш лозим деган хулосага келди.
Апелляция қўмитаси “Андижон” футбол клубининг футболчиси Рубин Хебайга нисбатан қўлланилган 3 та ўйинга четлаштириш интизом жазосини 2 та ўйинга ўзгартириш ҳамда жарима интизом жазосини ўзгаришсиз қолдириш юзасидан қарор қабул қилди.
Шунингдек, Апелляция қўмитаси “Андижон” футбол клуби томонидан Ҳакамлар қўмитасининг 2023 йил 23 мартдаги қарори устидан берилган шикоят аризасида Ҳакамлар қўмитасининг қарорини ўзгартириш учун етарли асослар мавжуд бўлмаганлиги учун қаноатлантиришни рад этди.
Изоҳ (0)