Пентагон АҚШ ва Хитой ўртасида ҳарбий можаро бошланиши эҳтимолини баҳолади
АҚШ ва Хитой ўртасида ҳарбий можаро бўлиши мумкин, аммо ҳозирча бунинг эҳтимоли деярли йўқ, деди АҚШ штаблари бошлиқлари бирлашган қўмитаси раиси, генерал Марк Милли Defence One нашрига берган интервьюсида.
Унинг таъкидлашича, Хитойда ҳам, АҚШда ҳам “яқинда уруш бўлади” ёки иккала томон ҳам “уруш ёқасида”, деган таассурот уйғотувчи кўплаб риторикалар мавжуд.
“Бу чиндан ҳам содир бўлиши мумкин. Айтмоқчиманки, назоратдан ташқари авж олиб кетадиган воқеа ёки бошқа можаро қўзғатувчи ҳодиса юз бериши мумкин. Аммо ҳозирча мен буни эҳтимолий деб таснифламайман”, — деди Милли.
Шунингдек у АҚШ Тайванга имкон қадар тезроқ қурол жўнатиши зарурлиги ҳақидаги чақириқларга қўшилишини билдирди.
Милли АҚШ Хитой—Россия ҳарбий иттифоқидан хавотирда, деган гапларга эрта эканини айтди. Генерал айрим белгилар борлигига қарамасдан, Россия—Хитой яқинлашуви ҳақиқий иттифоқдан жуда фарқ қилишини таъкидлади.
Тайван 1949 йилда Хитойдан мустақиллигини эълон қилган. Пекин ҳамон оролни ўзининг бўлгинчи вилояти деб билади. 2022 йилнинг кузида АҚШ Марказий разведка бошқармаси директори ўринбосари Девид Коэн Хитой раҳбари Си Цзиньпин ўз ҳарбийларига 2027 йилгача Тайван устидан ҳарбий назорат ўрнатишга тайёргарлик кўришни буюрганини айтганди. Пекин орол билан “тинч йўл орқали бирлашиш” ниятини ҳам билдирган.
