Хоразмда 14 та йирик саноат лойиҳалари инфратузилмаси учун қўшимча 100 млрд сўм йўналтирилади 

Айни вақтда президент Шавкат Мирзиёев халқ депутатлари Хоразм вилояти Кенгаши сессиясида иштирок этмоқда. Бу ҳақда “Дарё” мухбири хабар берди. 

Вилоят ҳокими Жўрабек Раҳимов давлат раҳбарига озиқ-овқат баланси бўйича режалари тўғрисида ахборот берди. Президент булардан келиб чиқиб масъулларга қатор топшириқлар берди. 

Шавкат Мирзиёев “Тошсоқа тизимидаги магистрал суғориш каналини тиклаш” лойиҳаси 2-босқичини бошлаш вақти-соати келганини таъкидлаб, бир ой муддатда бу лойиҳа бўйича таклифларни тақдимот қилиш юзасидан топшириқ берди.

Шунингдек, икки ҳафта муддатда “Дарёлиқ” магистрал коллектори тизимига насослар ўрнатишга 35 миллиард сўм ажратилади. Йил якунига қадар Боғот, Шовот ва Янгибозорда 2 минг гектарда узум, олма ва қовун плантациялари яратилиб, лизинг асосида тадбиркорларга тарқатилади.

2023 йилда Гурлан ва Боғотда агро-логистика марказлари ташкил этилиб, унга 5 миллион доллар йўналтирилади. Уч ойда чорвачиликка ихтисослашган 53 та маҳаллада сутни қабул қилиш пунктлари очилиб, тадбиркорларга берилади ва бу ишларга 20 миллиард сўм йўналтирилади.

Бундан ташқари, парранда гўшти танқис 363 та маҳалланинг ҳар бирида икки минг бош парранда боқишга мўлжалланган иккитадан лойиҳа бошланади ва бунга 10 млн доллар ажратилади.

Жўрабек Раҳимов саноат қанчага ўсиши, қайси лойиҳалар амалга оширилиши, ҳар бир туманга камида 50 млн доллар инвестиция жалб қилиш бўйича ҳисобот берди.

Бу борада йил якунига қадар 14 та йирик саноат лойиҳалари инфратузилмаси учун қўшимча 100 миллиард сўм йўналтирилади. Йил якунига қадар Урганч шаҳри ва Урганч туманида электротехника ва фармацевтика саноат парклари ташкил қилинади.