“Олмалиқ КМК” АЖ: 2022 йил сарҳисоби ва 2023 йилга белгиланган вазифалар

Пойтахтимиздаги Миллий матбуот марказида “Олмалиқ КМК” АЖ масъуллари иштирокида матбуот анжумани ташкил этилди. 

Тадбирда мамлакатимизнинг энг йирик саноат корхоналаридан бири ҳисобланган “Олмалиқ кон-металлургия комбинати” АЖнинг ўтган 2022 йил якунлари ҳамда ишлаб чиқарилган маҳсулотларнинг экспорти бўйича амалга оширилган ишлар, комбинатнинг экспорт салоҳияти ҳақида маълумот берилди.

Маълум қилинишича, 2022 йил якунлари бўйича Олмалиқ кон-металлургия комбинатининг молиявий-иқтисодий фаолияти бўйича барча прогноз кўрсаткичлар бажарилган. Хусусан, тайёр маҳсулотлар сотишдан тушган тушум 30,5 трлн сўмни ташкил этиб, Бизнес-режа 108,2%га бажарилган.

Соҳа мутахассисларининг таъкидлашича, корхона иқтисодий салоҳияти билан бирга экспорт кўрсаткичлари ҳам йилдан йилга ўсиб бормоқда. Жумладан, ҳисобот даврида 947,5 млн долларлик маҳсулотлар экспорт қилиниб, прогноз 110,8 фоизга бажарилиши таъминланди.

Бундан ташқари, 2022 йилда ОКМКда ишлаб чиқарилган мис концентратлари иборат биринчи контейнер блок поезди Болгариянинг Бургас шаҳрига юборилди.

Ўтган йил якуни бўйича соф фойда 6,7 трлн сўмни ёки прогнозга нисбатан 114,6%ни ташкил этди. Бунда маҳсулот ишлаб чиқариш рентабеллиги 21,8%ни ташкил этди.

2022 йилда ер қаъридан фойдаланганлик учун солиқ ставкасини 15%дан 10%гача, фойда солиғи ставкасини 75%дан 50%гача пасайтирилишига қарамасдан, давлат бюджетига 18,4 трлн сўм ёки ўтган йилга нисбатан 2,6 трлн сўмга кўпроқ тўловлар амалга оширилди. Шу жумладан 8,5 трлн сўм дивиденд тўланди.

• Олмалиқ кон-металлургия комбинати томонидан 2023 йилга белгиланган барча устувор вазифалар бажарилиши таъминланмоқда. Хусусан, жорий йилнинг январь ойида кузатилган аномал совуқларга қарамай, I чораги якунлари бўйича ҳажми 6,8 трлн сўмлик товар маҳсулоти ишлаб чиқарилиб, прогноз 100,0%га бажарилди, - деб маълумот берди «Олмалиқ КМК» акциядорлик жамияти бошқаруви раисининг иқтисодиёт, молия ва трансформация бўйича ўринбосари Феруза Ҳамидова

Қайд этиш жоизки, Kombiнат томонидан солиқ тўловлари давлатимиз бюджетининг қарийб 10%ни ташкил этиб, солиқ тўловчи корхоналар рўйхатида 2-ўринни эгаллайди. Шу билан бирга бюджетдаги улуши йилдан йилга ортиб бормоқда.

I чорак якунлари бўйича соф фойда 1,4 трлн сўмни ёки прогнозга нисбатан 100,1%ни ташкил этади. Бюджетга 2,6 трлн сўм тўловлар амалга оширилиб, прогноз 144,8%га бажарилади.

Ўзбекистон Республикаси Президентининг 2023 йил 24 мартдаги “Иқтисодиётда давлат иштирокини қисқартиришнинг қўшимча чора-тадбирлари тўғрисида” ПҚ-102-сон қарори асосида “Олмалиқ КМК” АЖнинг 2 фоиз акциялари сотилиши белгиланган. Президент қарорига мувофиқ жамият акциялари “Халқчил IPO” орқали “битта акция – битта лот” тамойили асосида электрон платформасида савдога чиқарилиши режалаштирилган.

Қарорга мувофиқ, комбинатнинг ўртача 2 фоиз акциялари аҳолига таклиф этилади. Бунда аҳолига акцияларни тўғридан-тўғри сотиб олиш имконияти яратилади. Акциялари сотилган корхоналар беш йил давомида соф фойдасининг камида 30 фоизи дивиденд тўлашга йўналтиради.

Таъкидлаш керакки, 2022 йил бошида электр таъминоти тизимида блекаут туфайли 25 январдан 28 январгача тўлиқ тўхталиши, ярим маҳсулот ишлаб чиқаришга салбий таъсир кўрсатди.

• Тезкор равишда кўрилган чоралар эвазига, биринчи навбатда энг муҳим участкаларга электр токини етказиш, шунингдек, ички захираларнинг ишга туширилиши ҳисобига сотиладиган маҳсулотлар ишлаб чиқариш таъминланди, – деди «Олмалиқ КМК» акциядорлик жамияти бош муҳандисининг технологиялар бўйича ўринбосари Абдуқаҳҳор Сайназаров. – Жумладан, мис катоди ишлаб чиқариш режаси 100 фоизга, мис сими, эмалланган сим, мис купороси режаси 100 фоизга бажарилди. Қимматбаҳо ва нодир металлар бўйича режа кўрсаткичлари ортиғи билан бажарилишига эришилди.  

Шунингдек, тадбир иштирокчиларига ижтимоий соҳани қўллаб-қувватлаш борасида олиб борилаётган ишлар ҳақида ҳам маълумот берилди.

Жумладан, 2022 йил март ойида комбинат ҳомийлигида Тошкент вилояти Шовғоз қишлоғида 120 ўринли янги мактабгача таълим объекти қурилди. Ушбу объект қурилишига 5,7 млрд сўм маблағ сарфланди.

Май ойида эса “БАҲОР” меҳмонхонасининг 102 кишилик янги корпуси фойдаланишга топширилди. Ушбу объектнинг қурилишига 31,4 млрд сўм маблағ йўналтирилди. Июль ойида 6,8 млрд сўмга 290 ўринли мактабгача таълим объекти мукаммал таъмирланди.

Октябр ойида Наманган вилояти Чодак қишлоғида 250 иш ўрнига эга янги тикув фабрикаси фойдаланишга топширилди.

Шу ойда комбинат ишчи-ходимлари ва уларнинг оила аъзолари дам олишлари учун Тошкент вилоятидаги 126 ўринли “Мовий тоғлар” дам олиш сиҳатгоҳи фойдаланишга топширилди

• Ҳозирда комбинат ҳомийлигида Олмалиқ шаҳридаги Тиббиёт бирлашмаси қошидаги шартномавий поликлиника ва туғруқ комплексининг реконструкция ишлари олиб борилмоқда. Ушбу объектларнинг реконструкция ишларига умумий ҳисобда комбинат томонидан 23 миллиард сўм маблағ йўналтирилган, – деди «Олмалиқ КМК» акциядорлик жамияти ижтимоий объектлар бошқармаси бошлиғI в.б. Камола Умаралиева

Таъкидлаб ўтиш лозимки, ОКМК Ижтимоий объектлар бошқармаси таркибида 16 та мактабгача таълим ташкилоти, 5 та болалар соғломлаштириш оромгоҳлари, “Металлург” маданият саройи,  Санаторий-профилакторий,“Олтин олма” пансионати, “Болажон” болалар боғи, Delfiн” аквапарки, “Баҳор” меҳмонхонаси, “Нуроний” пенсионерлар уйи, ОКМК спорт мажмуаси, “Мовий тоғлар” дам олиш маскани, Спорт техник клуби ва бошқа объектлар фаолиятлари йўлга қўйилган

Тадбирда журналистлар ўзларининг қизиқтирган саволларга мутахассислардан батафсил жавоблар олишди.

Реклама ҳуқуқи асосида.