Бухоро вилоятида эр-хотин ва унинг фарзанди, Фарғонада эса 17 ёшли қизнинг истироҳат боғларидан биридаги аттракциондан йиқилиб тушиши жамоатчилик орасида бугунги кунда аттракционларнинг талабга жавоб бериши масъуллар томонидан ўрганиладими? Уларнинг инсон ҳаёти учун хавфсизлиги қай даражада деган саволлар туғилишига сабаб бўлди. “Дарё” нашри ана шу саволларга жавоб олиш мақсадида масъулларга юзланди.
“Биз бирор бир боғга кириб, камчиликларни кўрсатиб, уни бартараф этиш бўйича айтиб, чиқиб кетсак, ўша боғга қайтиб киролмаймиз. Боиси тадбиркор ҳуқуқларини ҳимоя қилиш учун яратилган имконият бунга йўл бермайди. Яна ўша боғга кириб, аттракциондаги камчиликлар бартараф этилганини билиш учун Бизнес-омбудсмандан рухсат олишимиз керак бўлади”, — дейди Тоғ-кон геология ва саноат хавфсизлигини назорат қилиш инспекциясининг истироҳат боғларини назорат қилиш бўлими бошлиғи ўринбосари Абдуфотиҳ Рашидов.
Саноат хавфсизлиги давлат қўмитаси назорат профилактика фаолиятини таҳлил қилиш ва мувофиқлаштириш бошқармаси бошлиғи ўринбосари Олимжон Жўраев тадбиркорлар фаолиятини текшириш ваколати бўлмаса-да, ҳар йили республикадаги мавжуд истироҳат боғларидаги аттракционларни техник кўрикдан ўтказиш ишлари давом этаётганини айтмоқда.
“Текшириш ваколатимиз бўлмаса-да, байрам тадбирларидан олдин, байрам кунларида ёки мавсум аввалида давлат инспекторлари томонидан профилактик тадбирлар ўтказилмоқда. Бу тадбирлар давомида камчиликлар кўрсатиб берилиб, ҳар бир аттракционннинг талабга жавоб бериш-бермаслиги ҳақида аттракцион эгасига хулоса ҳам тақдим қилинмоқда. Аммо минг афсуски, бу хулоса ҳеч қандай натижа бермаяпти”, — дейди Олимжон Жўраев.
Масъулнинг қўшимча қилишича, инспекция назоратдан ўтказилган боғдаги аттракционнинг талабга жавоб бермаслиги ҳақида ёзиб, бу ҳақда вилоят, туман ва шаҳар ҳокимликларини, электр таъминоти корхоналарини огоҳлантириб, аттракфиондан фойдаланиш хавфли экани ҳақида маълумот берилади.
“Тан олиш керак, боғ ёки унинг ичидаги қайсидир аттракционнинг фаолиятини тўхтатишни сўраб, хат билан чиқсак-да, бундан натижа йўқ. Афсуски, ҳокимиятда ҳам, туман электр тармоқлари корхонасида ҳам, бизда ҳам алоҳида тадбиркорлик субъекти фаолиятини чеклаш бўйича етарлича ваколат йўқ. Боиси давлатимиз раҳбарининг тадбиркорларни қўллаб-қувватлаш борасидаги ташаббусларидан келиб чиққан ҳолда тадбиркорларга кенг имконият берилган”, — дейди масъул.
Тоғ-кон геология ва саноат хавфсизлигини назорат қилиш инспекциясининг истироҳат боғларини назорат қилиш бўлими бошлиғи ўринбосари Абдуфотиҳ Рашидовнинг маълумот беришича, Ўзбекистондаги мавжуд истироҳат боғлари 143 та бўлиб, бу боғларда 1845 та аттракцион бор.
“Тошкент шаҳри энг намунали ҳудуд бўлса-да, шаҳардаги мавжуд 17 та истироҳат боғидан 11 тасининг фаолияти рухсат берилган. Қолган боғларда жойлашган аттракционларнинг камчиликлари бўлгани сабаб уларнинг фаолият юритишига рухсат берилмаган. Аммо ҳудудлардаги боғларда жойлашган аттракционларни назоратдан ўтказиш масаласи жуда оғир”, — дейди Абдуфотиҳ Рашидов.
Масъулларнинг айтишича, тадбиркорлар уларнинг манфаати шахсан давлат раҳбари томонидан ҳимоя қилинаётганидан келиб чиқиб, аттракционларида камчилик бўлса-да, ўзбошимчалик билан уларни ишлатиб, одамлар ҳаётини хавф остига қўймоқда.
“Биз тадбиркор ишлатаётган аттракционнинг носоз эканини айтсак-да, хулоса берсак-да, буни тақиқлаб қўйишга ваколатимиз йўқ. Хусусан Бухоро ва Фарғона вилоятларидаги носоз аттракционлар ҳам фаолият юритиши учун хавфли деб топилган. Бироқ тадбиркорлар ўзбошимчалик қилиб, тартибга бўйсунмаган. Оқибатда кўнгилсиз воқеалар рўй берди”, — дейди Абдуфотиҳ Рашидов.
“Дарё”нинг Фарғона вилоятидаги мухбири Азизжон Эрматов масъуллар фаолиятига рухсат берилмагани айтилаётган аттракцион эгаси билан суҳбатлашди. ЯТТ “Тўйчиев Иномжон Маҳамматтолипович” уларнинг аттракциони Тоғ-кон геология ва саноат хавфсизлигини назорат қилиш инспекцияси томонидан назоратга олинганини ва кўрикдан ўтказилганини айтиб, бу ҳақдаги ҳужжатни тақдим қилди. Бироқ, бу ҳужжатда масъуллар назорати 2022 йилнинг июль ойида амалга оширилгани кўринган. Масъул ташкилот вакиллари эса аҳолига хизмат кўрсатувчи аттракционлар ҳар мавсум аввалида кўрикдан ўтиши кераклигини, имкон қадар бир йилда икки маротаба синов бўлиши кераклигини билдирмоқда.
Аниқланишича, Тоғ-кон геология ва саноат хавфсизлигини назорат қилиш инспекциясининг айни пайтда Андижон, Наманган, Қашқадарё, Сирдарё, Жиззах ва Тошкент вилоятларида вакиллари йўқ. Ва бу вилоятлардаги мавжуд аттракционлар назорати ҳам очиқлигича қолмоқда.
Изоҳ (0)