Ўзбекистонда савдо қоидаларини бузганлик учун жиноий жавобгарлик бекор қилиниши мумкин
Адлия вазирлиги “Тадбиркорлик субъектлари томонидан савдо ёки хизмат кўрсатиш қоидаларини бузганлик учун жиноий жавобгарлик маъмурий юрисдикцияга ўтказилаётгани муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасини муҳокамага қўйди.
2022 йил августда савдо қоидаларини бузганлик учун жиноий жавобгарликни бекор қилиш масаласини президент Шавкат Мирзиёев тадбиркорлар билан учрашувда маълум қилганди. Давлат раҳбарининг сўзларига кўра, 30 йилдан бери савдо соҳасида фаолият юритаётган тадбиркорларни ташвишга солиб келаётган муаммо бартараф этилади.
Биринчи марта хатоликка йўл қўйган кичик бизнес субъектлари жавобгарликка тортилмайди. Бунинг ўрнига солиқ органлари томонидан камчиликларни бартараф этишга хизмат қиладиган тизим жорий этилади. Шу билан бирга, президент жарималар миқдори тадбиркорлар томонидан тўланадиган солиқлардан ошиб кетмаслигини таъкидлаганди.
Жиноят кодексининг 189-моддасида савдо ёки хизмат кўрсатиш қоидаларини бузганлик учун жиноий жавобгарлик белгиланган. Бунда, товарлар савдоси ёки хизмат кўрсатиш қоидаларини жуда кўп миқдордаги қийматда (базавий ҳисоблаш миқдорининг 500 баравари ва ундан ортиқ) бузиш учун базавий ҳисоблаш миқдорининг 300 бараваридан 600 бараваригача миқдорда жарима ёки икки йилгача ахлоқ тузатиш ишлари тарзидаги жазолар белгиланган.
Ушбу модданинг иккинчи қисмида мазкур жиноятни биринчи марта содир этган шахс, агар у жиноят аниқланган кундан эътиборан 30 кунлик муддатда савдо ёки хизмат кўрсатиш қоидалари бузилишининг оқибатларини бартараф этган ва етказилган моддий зарарнинг ўрнини қоплаган бўлса, жавобгарликдан озод этилиши белгиланган.
Таклиф этилаётган лойиҳа билан тадбиркорлик субъектларининг ҳуқуқий ҳимоясини янада кучайтириш борасида улар томонидан товарлар савдоси ёки хизмат кўрсатиш қоидаларини жуда кўп миқдордаги қийматда бузганлик учун жиноий жавобгарликни маъмурий юрисдикцияга ўтказиш белгиланмоқда.
Лойиҳа билан Маъмурий жавобгарлик тўғрисидаги кодексга товарлар савдоси ёки хизмат кўрсатиш қоидаларини жуда кўп миқдордаги қийматда бузганлик учун жавобгарлик киритилиб, амалдаги Жиноят кодексидан мазкур ҳуқуқбузарлик учун жавобгарлик декриминаллаштирилаётгани муносабати билан Жиноят, Жиноят-процессуал ҳамда Маъмурий жавобгарлик тўғрисидаги кодексларга тегишли таҳририй ўзгартиш ва қўшимчалар киритиш назарда тутилмоқда.
