Тошкент шаҳар Миробод тумани Локомотив кўчасида биринчи автоматлаштирилган смарт санитария-гигиеник шохобчасининг очилиш маросими бўлиб ўтди. Бу ҳақда Туризм ва маданият вазирлиги матбуот хизмати хабар берди.
Марзкур шохобча эркаклар, аёллар ҳамда ногиронлиги бўлган шахсларга мўлжалланган ҳожатхоналар, ювиниш хонаси ҳамда ходимлар хонасини ўз ичига олган.
Маданият ва туризм вазирлиги бўлим бошлиғи Муҳайё Ҳайитовага кўра, президентнинг тегишли фармонига мувофиқ, Маданият ва туризм вазирлигининг ташаббуси билан тадбиркорлик субъектларига замонавий санитар-гигиеник шохобчаларни қуриш учун 80—100 квадрат метр ўлчамда ер майдонларини электрон аукционга қўймасдан олиш имконияти яратилган.
Ушбу имтиёз натижасида республика бўйича 150 нафардан ортиқ тадбиркорлик субъектларига замонавий санитар-гигиеник шохобчалар қуриш учун тегишли ер майдонлари ажратилган. Келгусида бундай шохобчалар сонини янада ошириш, бошқа ҳудудларда ҳам кун-у тун ишлайдиган шохобчалар қуриш режалаштирилган.
Таъкидланишича, мазкур шохобчанинг бошқа шу сингари шохобчалардан асосий афзаллиги унинг автомат режимда ишлаши ва энг замонавий санитар-гигиеник мосламалар билан жиҳозланганида. Қолаверса, унда жисмоний имконияти чекланган, ногиронлиги бўлган шахслар, ёш болали ота-оналар қулай фойдаланишлари учун ҳам имкониятлар яратилган.
“Маданият ва туризм вазирлиги, Тошкент шаҳар ҳокимлиги ёрдамида замонавий, ҳамма талабга жавоб берадиган шохобчани қуриб битказдик. Шохобчани қуришда Хитой, Беларусь, Россия каби хорижий давлатлардан келтирилган замонавий техника воситаларидан фойдаландик. Аҳолининг ҳар бир қатлами учун қулайлик яратишга ҳаракат қилдик”, — дейди тадбиркор Камолиддин Данабоев.
.jpg)
Маълумот учун, 2017 йилда жами 200 та санитар-гигиеник шохобча фаолият юритган бўлса, 2022 йилга келиб уларнинг сони 7,5 мингдан ошган. Шулардан 3,9 мингтаси янги қурилган, 3,6 мингтаси қайта таъмирланиб, фойдаланишга топширилган.
Изоҳ (0)