Тошкентда ўз бувисини уриб ўлдирган йигитга ҳукм ўқилди (видео) 

Тошкент шаҳар Миробод туманида ўз бувисини уриб ўлдирган йигитга суд ҳукми ўқилди. Бу ҳақда “Замон” дастурида хабар берилди. 

Хабарга кўра, воқеа содир бўлган куни судланувчи йигит маст ҳолатда бўлган. Спиртли ичимлик таъсирида бувиси билан жанжаллашган. Оқибатда судланувчи бувисининг турли қисмларига тан жароҳати етказган. Тез ёрдам келгач жабрланувчида биологик ўлим ҳолатини қайд этган. 

Судланувчи ўша куни содир бўлган воқеа ҳақида гапириб берди ва бувисини эҳтиётсизлик сабаб йиқитиб қўйганини айтиб ўтди. 

“Бувим билан тахминан 10 йилдан буён яшар эдик. Ота-онам вафот этган. Бувим 85 ёшда эди. Бир йилдан бери юролмасди. Унинг ягона боқувчи ва парваришловчиси эдим. Вақти-вақти билан спиртли ичимлик ичаман. Ўша куни ҳам маст эдим. Аввалига бувимни овқатлантирдим, ҳатто бир қадаҳ ароқ ҳам қуйиб бергандим. Эҳтиётсизлик туфайли уни йиқитиб қўйдим. Кейин жаҳлимни чиқаргани учун урдим ҳам. Эрталаб ўзини ёмон хис қилаётганди. Унга дори бериб тез ёрдам чақирдим ва ухлаб қолдим. Шифокорлар ўлиб қолганини айтишди”, дейди йигит.

Жиноят ишлари бўйича Миробод туман судида кўриб чиқилган мажлисда эса томонлар тенг равишда тингланди. Ишга доир материаллар, шунингдек, гувоҳлар кўрсатмасини ҳисобга олган ҳолда ҳукм эълон қилинди. Унга кўра, судланувчи Жиноят кодексининг 104-моддаси 3-қисмида назарда тутилган жиноятни содир этганликда айбдор деб топилди ва 8 йил муддатга озодликдан маҳрум этилди.