Адлия вазири Акбар Тошқулов 28 март куни бўлиб ўтган матбуот анжуманида “Open budjet” портали орқали амалга оширилаётган “Ташаббусли бюджет” лойиҳаси ҳақида ўз фикрларини билдириб ўтди, дея хабар бермоқда “Дарё” мухбири.
Тармоқларда “Ташаббусли бюджет” лойиҳасида ғолиб бўлиш мақсадида овоз бериш учун фуқароларга турли қимматликлардаги пул ёки озиқ-овқат маҳсулотлари берилаётгани кенг муҳокамаларга сабаб бўлмоқда. Шунингдек, жойларда мактаб ўқитувчилари ҳам лойиҳа учун овоз йиғишга жалб қилинаётгани ҳақида хабарлар тарқалмоқда.
Акбар Тошқуловнинг айтишича, “Ташаббусли бюджет” лойиҳаси ижобий ғоя сифатида жорий этилган.
“Open budjet” порталининг энг катта ютуғи нима? Энг катта ютуғи бу — халқ пулни қаерга сарфлашни ўзи ҳал қиляпти. Пул орқали овоз йиғилиши аслида ноқонуний йўл. Бунинг қонуний йўли электрон тизим орқали овоз бериш керак, бўлди. “Open budjet” порталига юридик жиҳатдан баҳо берадиган бўлсам, бу халқ пулини сарфлашни ҳал қилишдаги Ўзбекистон учун янги ғоя. Биринчи ўринда давлат органи емас, яъни шундоқ келиб буни қилиш керак, деб давлат органи белгиласин демаяпти, халқ белгиласин деяпти”, — деди адлия вазири.
Унинг алоҳида таъкидлашича, мазкур лойиҳада муаммолар кузатилаётган бўлса, унинг ечимини кўрсатадиган механизм ишлаб чиқилиши зарур.
“Лекин муаммолар бор, муаммони ечиш керак. Муаммо қандай ечилади? Қанақадир суиистеъмол қилиш ҳолатлари бўлаётган бўлса, унинг олдини оладиган механизм бўлади. Балки, мана идентификация қилишдир? Лекин буни қилмаймиз дейишди. Аммо барибир у ҳам керакдир, балки. Кеча, якшанба куни айланиб юрганимда менга ҳам овоз беришни таклиф қилишди. “Йўқ, мен бу маҳаллада сайр қилиб юрибман. Маҳаллам бошқа, ўзимнинг маҳалламга овоз бераман”, дея жавоб бердим”, — деди Акбар Тошқулов.
Мавзуга доир:
Изоҳ (0)