Жанг ўчоғи бўлган Бахмутда Россия ва Украина кучлари ўртасида жанговар тўқнашувлар сони камайди. Украина Қуролли кучларининг шарқий гуруҳи спикери Сергей Череватий бунинг сабабини айтди.
Череватийнинг сўзларига кўра, Бахмут йўналишида кун давомида рус кучлари билан 19 та жанг бўлиб ўтди, шундан 14 таси шаҳарда қайд этилган.
“Охирги уч кун ичида жанглар сони камайди, аммо Бахмутдаги вазиятни жиддий таҳлил қилиш керак, бунга қўшинларнинг маълум бир қайта гуруҳланиши сабаб бўлган бўлиши мумкин. Ўйлайманки, кейинги кунлар ёки бир ҳафта ичида бунга нима сабаб бўлганини билишимиз мумкин”, — деди Череватий.
Бахмут йўналишида Россиянинг асосий зарба берувчи кучи “Вагнер”нинг аскарлари бўлиб қолмоқда, аммо улар мунтазам қўшинлар билан мустаҳкамланган. Кун давомида Россия артиллерия ва реактив тизими билан 104 марта зарба берган. 27 март куни эса Россия Бахмутнинг ўзига 70 марта зарба берган.
Череватий тўқнашувлар давомида 86 нафар россиялик ҳарбий йўқ қилингани, 117 нафар Россия кучлари эса яраланганини маълум қилди. Россиянинг “Гвоздика” ўзиюрар қуроллари ва “Стриж” станцияси Украина мудофаа кучлари томонидан ўққа тутилган.
Изоҳ (0)