АҚШ Сенати Ироқда ўн йиллаб давом этган урушни бошлаш учун берилган рухсатномаларни бекор қилди

АҚШ Сенати Ироқда жанг олиб бориш учун 1991 ва 2002 йилларда қабул қилинган  рухсатномаларни бекор қилиш тўғрисидаги қонун лойиҳасини маъқуллади. Бу ҳақда Reuters хабар бермоқда.

Ҳужжат учун 65 киши овоз берди, 28 қонунчи (барчаси республикачилар) унга қарши чиқди. “Ушбу рухсатномаларни бекор қилиш минтақа (Ироқ) ва бутун дунёга Қўшма Штатлар ишғолчи куч эмаслигини, Ироқдаги уруш тугаганини, биз Ироқ билан стратегик шерик сифатида ишлаётганимизни кўрсатади, ” — дейди демократ сенатор, халқаро алоқалар қўмитаси раиси Боб Менендес.

Конгресс аъзолари кўп йиллар давомида қонунчилар президентларга ҳарбий хизматчиларни урушга жўнатиш бўйича ҳаддан ташқари кўп ваколат бераётгани ҳақида баҳслашиб келади. Янги қонун лойиҳаси президентнинг ҳарбий ваколатларини чеклаш ва конституцияда кўрсатилган ҳолатларда ҳарбий ҳаракатлар бошлашни маъқуллаш бўйича Конгресснинг мутлақ ҳуқуқини тасдиқлашга мўлжалланган.

АҚШнинг Ироқдаги ҳарбий миссияси ёки Ироқ уруши 2003 йилда бошланган. Вашингтон қўшин киритилишини Саддам Ҳусайн ҳукумати оммавий қирғин қуролларини ишлаб чиқармоқда, деган тахмин билан оқлаган ва ҳарбийларни режимни ағдаришга чақирган. Мамлакатда энг кўп ҳарбий хизматчилар 2008 йилда жойлаштирилган — президент кичик Жорж Буш қарорига биноан у ерга деярли 158 минг киши юборилган.

2011 йилда операция тугаган деб эълон қилинди ва АҚШнинг кейинги президенти Барак Обама кўрсатмаси бўйича америкалик ҳарбийларнинг аксарияти мамлакатни тарк этди.