Тошкентда бу йил баҳорда иссиқ сувни 5 кунга ўчириш режалаштирилмаяпти

Veolia Energy Tashkent бу йил баҳорда иссиқ сувни 5 кунга ўчириш режалаштирмаётганини эълон қилди.

“Иссиқлик тармоқларининг гидравлик синовлари кейинроқ бошланади. Бунда, сувнинг ўчирилиши бутун шаҳарда бир вақтни ўзида эмас, балки кварталлар бўйича амалга оширилади”, — дейилади компания хабарида.

Қайд этилишича, бундай ёндашув ўтказиладиган синовлар сифатини оширади. Мутахассисларнинг эътибори иссиқлик тармоғининг кичик бир қисмига қаратилади, яъни текшириш батафсилроқ бўлиб, кўпроқ нуқсонларни аниқлайди.

Veolia Energy ахборотига кўра, 5 кунлик иссиқ сув таъминотини ўчириш гидравлик синовлар (босим билан текшириш) пайтида амалга оширилади. Улар, бошқа нарсалар қатори, қувурлардаги нуқсонларни аниқлаш учун ҳам зарур. Нуқсонларни профилактик бартараф этиш, иситиш мавсумида авария ҳолатлар сонини камайтиради.

Иссиқ сув кварталлар бўйича ўчирилади. Ўчирилишлар ҳақида расмий Telegram-каналда олдиндан хабар қилинади. Гидравлик синовлар ёз-куз мавсумига (келгуси иситиш мавсуми бошланишига яқин) режалаштирилган.

Аввалроқ Тошкентда 27 мартдан 5 апрелга қадар иссиқ сув бир кунга ўчирилиши хабар қилинганди. Veolia Energy хабарида айтилишича, бир кунлик ўчириш иссиқлик тармоқларини мўлжалланган ҳарорат бўйича синовдан ўтказиш учун зарур. Улар 2 йилда 1 марта ўтказилади. Мутахассислар ҳарорат деформасияси шароитида қувурларнинг мустаҳкамлигини текширади.

Компания, шунингдек, нима учун синовлар ўтказилганига қарамай, иситиш мавсумида авариялар содир бўлишига изоҳ берди.

“Тошкент шаҳридаги иссиқлик тармоқлар қониқарсиз ҳолатда. Иситиш мавсумида авария ҳолатлари сонини камайтириш учун, биз иситишаро даврда иссиқлик трассалари участкаларини алмаштирамиз ва нуқсонларни бартараф этамиз. Иссиқлик тармоқларини босқичма-босқич модернизасия қилиш натижасида нуқсонлар сони камаяди”, — дейилади ушбу савол юзасидан берилган жавобда.