Тошкент вилоятида кучли таъсир қилувчи дориларни оздирувчи дори деб сотаётган қозоғистонлик фуқаро қўлга олинди

Тошкент вилоятида “оздирувчи дори” сифатида сотилаётган 100 минг дона кучли таъсир қилувчи воситаларнинг муомаласига чек қўйилди, деб хабар бермоқда вилоят ИИББ матбуот хизмати.

Маълум қилинишича, Тошкент вилояти ИИББ Гиёҳвандлик ва психотроп моддаларнинг ноқонуний муомаласига қарши курашиш бўлими, ҳамкор ташкилотлар томонидан вилоятнинг Зангиота туманида навбатдаги назорат-рейд тезкор тадбири ўтказилган.

Тадбирда 1989 йилда туғилган аёл Г.Д.нинг яшаш хонадони холислар иштирокида кўздан кечирилганда уй ичи ва ҳовлидаги машинада қора бозордаги нархи 200 миллион сўмга тенг 15 хил ном ва кўринишдаги 36 минг 696 дона кучли таъсир қилувчи дори воситалари сотиш мақсадида сақлаб келинаётгани аниқланган.

Шундан сўнг тезкор тадбир давом эттирилиб, бу аёлга дори воситаларини етказиб бераётган таъминотчи ҳам Ўзбекистон ҳудудига “товар” билан кирган вақтида ИИББ ходимлари томонидан қўлга олинган.

Аниқланишича, Қозоғистон фуқароси бўлган Э.Ў. (1989 йилда туғилган) 2 минг қути ёки 72 минг дона таркибида кучли таъсир қилувчи модда бўлган (Ўзбекистонда савдоси тартибга солинган) дориларни яширин равишда давлат чегарасидан олиб ўтган.

Ҳозирда мазкур ҳолат юзасидан Жиноят кодексининг 251-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) 3-қисми билан жиноят иши қўзғатилиб, тергов ҳаракатлари ўтказилмоқда.