Тошкент метросида зўравонликка қарши тарғибот баннерлари ўрнатилди (фото)

Тошкент метрополитенида “Зўравонлик — маданиятимизга бегона” номли тарғибот баннерлари пайдо бўлди.

Баннерлар Миллий масс-медиани қўллаб-қувватлаш ва ривожлантириш жамоат фонди томонидан илгари сурилган Нолалар лойиҳаси томонидан ўрнатилган. Унда аёл-қизларнинг зўравонлик, уларга нисбатан куч ишлатиш вақтидаги нолалари туширилган. Шунингдек, овоз тўлқинлари эквалайзерини англатувчи график тасвирлар ва адрас безаклари уйғунлаштирилган.

Лойиҳа сайтида айтилишича, бундан асосий мақсад сўнгги йилларда ўзбекистонлик аёлларнинг зўравонлик қурбони бўлаётгани ҳақида медиа манбаларда тез-тез учраётган янгиликлар фонида унга жамоат жойларида ҳам эътиборни кучайтириш, мавзуни янада долзарблаштириш билан биргаликда салбий вазиятларнинг сонини ҳам кескин камайтиришдир.

Унда таъкидланишича, Ўзбекистонда оиладаги зўравонлик кенг тарқалган бўлса-да, бу ҳақда кам гапирилади. Кўп ҳолатларда оилада зўравонликка учраганлар турли сабаблар билан бу ҳақда сукут сақлашга мажбур бўлади. Бундай пайтларда уларнинг ноласига қулоқ тутадиганлар жуда кам топилади. Шу сабабли ула мурожаат қилиши ва кўмак берилиши учун ушбу сайт ишга туширилди.

“Nolalar.com — бутун Ўзбекистон жамоатчилигининг эътиборини аёлларга нисбатан зўравонликдан огоҳ бўлиш, унинг олдини олиш ва асоратларини енгиллаштириш учун яратилган лойиҳадир”, — дейилади лойиҳа сайтида.