Тошкентда фуқарога хонадоннинг ярим млрд сўм миқдоридаги улуши ундириб берилди

Тошкент шаҳри Мирзо Улуғбек туманида фуқарога хонадоннинг ярим миллиард сўм миқдоридаги улуши ундириб берилди. Бу ҳақда МИБ ахборот хизмати “Дарё”га хабар берди.

Мажбурий ижро бюросининг Мирзо Улуғбек туман бўлими иш юритувида Фуқаролик ишлари бўйича И.Шафигулиндан ундирувчи И.Дусаев  фойдасига хонадоннинг 4 дан 1 улуш қисми 513 миллион 13 минг сўм миқдорида ундириш тўғрисидаги ижро ҳужжати юзасидан 16 март куни “Суд ҳужжатлари ва бошқа органлар ҳужжатларини ижро этиш тўғрисида”ги қонуннинг 23-моддаси талабларига асосан ижро иши юритуви қўзғатилган. 

Мазкур ижро иши юзасидан шу куннинг ўзида бюронинг туман бўлими томонидан 513 миллион 13 минг сўм миқдоридаги улуши ундирувчи И.Дусаевга тўлиқ ундирилиб, ижро иши “Суд ҳужжатлари ва бошқа органлар ҳужжатларини ижро этиш тўғрисида”ги қонуннинг 41-моддаси 1-бандига асосан амалда тамомланган.